Alarmante: Ajri i ndotur po vret rreth 500.000 foshnja në vit në mbarë botën

  • E.K /
  • 21 tetor 2020 - 10:16
Alarmante: Ajri i ndotur po vret rreth 500.000 foshnja në vit në mbarë botën

Sipas të dhënave, rreth gjysmë milioni foshnja kanë vdekur gjatë muajit të parë të jetës vitin e kaluar në mbarë botën për shkak të ndotjes së ajrit. Shumica e rasteve u shënuan në shtetet në zhvillim.

Ekspozimi ndaj ndotësve të ajrit është i dëmshëm për foshnjat edhe para lindjes. Ajri i ndotur mund të shkaktojë lindje të parakohshme ose peshë të vogël trupore të foshnjës. Të dy këta faktorë janë të lidhur me shkallë më të lartë të vdekshmërisë së foshnjave.

Rreth dy të tretat e 500.000 vdekjeve të foshnjave ishin të lidhura me ndotjen e ajrit në mjedise të mbyllura, sidomos me ndotjen e shkaktuar nga djegia e thëngjillit, drurit dhe jashtëqitjeve të kafshëve, shkruan The Guardian.

Këto të dhëna u publikuan në raportin “Gjendja Globale e Ajrit 2020”, ku u shtjelluan vdekjet në tërë botën, por edhe lidhja e ndotjes së ajrit me problemet shëndetësore.

Ekspertët mjekësorë për vite të tëra kanë paralajmëruar për ndikimin e ajrit të ndotur te personat e moshuar dhe tek ata që kanë probleme shëndetësore, por më vonë kanë filluar ta kuptojnë edhe ndikimin te foshnjat që nuk janë lindur ende.

(Kosova Sot Online)