Publikohet “dokumenti i skandalit” – Si e paralajmëroi Sllovakia Austrinë për terroristin nga Tetova

E.K /
04 November 2020 - 18:10

Autoritetet e Sllovakisë kishin informuar ato të Austrisë se më 21 korrik të këtij viti, Kujtim Fejzullahi me një tjetër, kishin tentuar të blejnë armë dhe municion në Bratislavë. Përmes INTERPOL’it, autoritetet austriake më 10 shtator identifikuan njërin prej tyre.

Mediat austriake sot kanë raportuar për “dokumentin e skandalit” të natës së terrorit në Vjenë.

Lexoni edhe:

Biden vazhdon të prijë në qytetin që ia përcakton fitoren

Në dokumentin e publikuar nga “Heute”, thuhet se janë të dhënat e Kujtim Fejzullahit, i cili kishte tentuar të blinte armë dhe municion në Bratislavë.

“Ministria e Brendshme e Republikës Sllovake paralajmëroi austriakët qartë: Në një letër për përdorim zyrtar. Më 21 korrik 2020, sipas gjendjes së informacionit, dy persona u përpoqën – ndoshta me një gjuhë arabe, turke ose çeçene – në dyqanet e armëve në Bratislavë për të blerë municione 7.62 x 39 mm për pushkën sulmuese AK-47 (Kalashnikov). Këta njerëz përdorën makinën e pasagjerëve BMW, ngjyrë të bardhë, regjistrim austriak: W – *****”, thuhet në raportimin e mediave austriake.

I gjithë informacioni u dërgua në institucionet austriake përmes zyrës ndërlidhëse të EUROPOL-it më 23 korrik 2020.

“Zyra austriake e ndërlidhjes e EUROPOL na njoftoi këtë informacion në 10 shtator, 2020: Policia austriake identifikoi njërin nga dy burrat që donin të blinin municionin për AK-47. Ndoshta xxx xxxx (atentatori), i lindur xxxxx në Mödling, shtetas austriak, banor: xxxxxxx Vjenë (shënim: të gjitha të dhënat e sakta) Policia austriake ka dijeni për sa më sipër në lidhje me terroristin. Në 2019 ai u dënua me 22 muaj sipas §278a (organizatë kriminale) dhe § 278b (shoqatë terroriste) të Kodit Penal Austriak”, thuhet tutje.

Vetura ishte në pronësi të një gruaje nga Kosova. Ndaj djalit të saj janë ngritur procese gjyqësore, pasi kishte qëndrim pozitiv ndaj xhihadit dhe Shtetit Islamik.

“Pronar i veturës BMW 320d, numri i regjistrimit: W – ***** është xxxxxxx i lindur xxxxxx në Kosovë, banor: xxxxxxWien. Policia austriake nuk ka të dhëna kriminale për këtë grua. Djali i saj xxxxxxx, i lindur në xxxxxx, jeton në të njëjtën adresë. Për shkak të radikalizimit të tij, tashmë janë ngritur procese gjyqësore kundër tij. Ai vizitonte rregullisht një xhami, është rreptësisht fetar dhe ka një qëndrim pozitiv ndaj xhihadit dhe Shtetit Islamik”, bëjnë të ditur mediat.

Në një konferencë shtypi, Ministri i Brendshëm Nehammer falënderoi policinë, pranoi gabimet dhe dha informacionet në lidhje me situatën.

Kryetari i FPO’së, Herbert Kickl tha se është konfirmuar se Ministria e Brendshme tashmë kishte pasur informacione për terroristin.

“Është konfirmuar që Ministria e Brendshme tashmë kishte informacionin në korrik. Është përgjegjësi politike e Ministrisë së Brendshme që ky terrorist nuk u tërhoq. Nëse Nehammer do të kishte karakter, ai do të duhej të jepte dorëheqjen menjëherë”, ka deklaruar Kickl.

Kur u pyet për kritikat e Kickl, ministri i brendshëm tha se ai e ka shkatërruar Minsitrinë e Brenshme.

“Kickl shkatërroi BVT. Ai ishte ish-ministri i brendshëm dhe është fajtor për gjendjen e BVT. Unë duhet të përmbahem nga të them atë që mendoj dhe mbetet e denjë për një ministër i brendshëm”, ka thënë ai.