Caktohet masa e paraburgimit ndaj 8 personave që ishin pjesë e një grupi kriminal

Gjykata ka caktuar masën e paraburgimit kundër tetë të pandehurve për veprën penale ‘pjesëmarrja ose organizimi i grupit kriminal’

Prishtinë, 14 nëntor 2020 – Gjykata Themelore në Prishtinë ka aprovuar kërkesën e Prokurorisë Speciale për caktimin e masës së paraburgimit kundër të pandehurve A.K L.B, K.B, F.G, A.S, E.Z, H.K dhe L.B për shkak të veprës penale ‘pjesëmarrja ose organizimi i grupit kriminal të organizuar’.

Të pandehurve A.K, L.B, K.B, F.G, A.S, E.Z, H.K dhe L.B iu është caktuar masa e paraburgimit në kohëzgjatje prej 1 (një) muaji për secilin veç e veç.

“Gjykata ka vlerësuar se ekzistojnë arsyet ligjore për caktimin e paraburgimit, pasi që në rastin konkret hetimi është në fazën fillestare dhe lënia në liri e të pandehurve paraqet rrezik real, se të njëjtit mund të shmangen nga ndjekja penale dhe të ndikojnë në dëshmitarë, kjo vepër është kryer përmes krimit kompjuterik dhe me qëndrimin në liri ekziston rreziku se të pandehurit përmes platformave të ndikojnë në dëshmi, duke shkatërruar ato apo ndikuar në to”, thuhet në komunikatën e tyre.

Palët kanë të drejtën e ankesës kundër këtij vendimi në Gjykatën e Apelit të Kosovës.

(Kosova Sot Online)