Sot shënohet dita botërore për parandalimin e abuzimit të fëmijës

  • E.K /
  • 18 November 2020 - 11:07
 Sot shënohet dita botërore për parandalimin e abuzimit të fëmijës

Qendra për Arsim të Kosovës (KEC) në partneritet me Qendra për Studime të Avancuara (FIT) sot do të shënojnë “Ditën Botërore për Parandalimin e Abuzimit të Fëmijës”.

Përmes një njoftimi për media thuhet se kjo ditë do të shënohet në kuadër të projektit “Së bashku kundër abuzimit të fëmijës – TACA”, projekt i financuar nga Bashkimi Evropian në kuadër të Instrumentit për Demokraci dhe të Drejtat e Njeriut (EIDHR).

Sipas njoftimit, ky projekt ka filluar të zbatohet në shkurt të vitit 2020 dhe ka për qëllim të sigurojë që të gjithë fëmijët të trajtohen me respekt të plotë për dinjitetin dhe të drejtat e tyre duke promovuar mjedis pa abuzim në shkollat e Kosovës.

Ndërkaq, siç thuhet tutje në njoftim Qendra për Arsim e Kosovës (KEC) dhe Qendra për Studime të Avancuara (FIT) fushatën e filluan duke mbledhur mesazhe dhe punime kundër abuzimit nga nxënësit e shkollave përfituese të projektit dhe duke i shpërndarë ato në faqe të internetit, duke dhënë informacione rreth rëndësisë që ka kjo ditë dhe, duke krijuar partneritet me Institucionet shtetërore që punojnë për promovimin dhe mbrojtjen e të drejtave të fëmijës.

Ndryshe, në vitin 2000, Fondacioni i Samitit Botëror të Grave (WWSF), një organizatë joqeveritare, shënoi Ditën Botërore për Parandalimin e Abuzimit të Fëmijës më 19 nëntor.

Ky fondacion, së bashku me një koalicion ndërkombëtar të organizatave avokuese për gratë dhe çështjet e fëmijëve, mobilizuan qeveritë dhe shoqëritë për të ndërmarrë veprime dhe për të parandaluar abuzimin e fëmijëve. Në 2001, shumë shtete u bashkuan për të shënuar këtë ditë duke kontribuar në dhënien e këshillave për identifikimin dhe parandalimin e abuzimit të fëmijës.

Kjo është një ditë e cila është në përputhje me përvjetorin e Ditës Ndërkombëtare për të Drejtat e Fëmijës (20 Nëntor) dhe, e cila ka për qëllim të jetë një pikë grumbullimi rreth çështjes së abuzimit të fëmijës dhe nevojës për programe urgjente parandaluese efektive.

Në vitin 2001, koalicioni ndërkombëtar i OJQ-ve bashkoi 149 organizata në më shumë se 60 vende të botës. Secila organizatë shënoi Ditën me aktivitete dhe ngjarje lokale ose kombëtare. Në vitin 2009 fushata u zhvillua nga 785 organizata nga 127 vende nga e gjithë bota.

(Kosova Sot Online)