Në Gjilan themelohet grupi punues për menaxhimin e situatës me vërshime

  • G.G /
  • 11 janar 2021 - 13:02
Në Gjilan themelohet grupi punues për menaxhimin e situatës me vërshime

Pas reshjeve të mëdha të shiut e borës në Gjilan, ku u shkaktuan vërshime në disa pjesë, kryetari i Komunës, Lutfi Haziri, ka dal sot në terren për ta parë gjendjen nga afër.

Haziri ka bërë të ditur se ka themeluar grupin punues për menaxhimin e situatës, ku pos institucioneve të Komunës, do të jenë të përfshira edhe KRU Hidromorava, Policia e Kosovës dhe FSK.

Kryetari i Gjilanit tha se gjendja po menaxhohet me të gjitha mundësitë komunale e në bashkëpunim edhe me institucionet tjera.

Ndërkohë, në terren që nga e diela kanë qenë në vazhdimësi ekipet e Komunës, të kryesuara nga drejtori për Mbrotje dhe Shpëtim, Sami Spahiu dhe drejtori i Shërbimeve Publike, Naser Korça.

“Nga këto vërshime është vërshuar dhe rrezikuar dje edhe trafostacioni kryesor i qytetit TS 110/KW Gjilani 5 nga vërshimi ujit në ora 11:50, ekipet emergjente kanë vendos pompa uji dhe është shmangur rreziku nga përmbytja totale e këtij trafostacioni me rëndësi të qytetit. Gjithashtu në disa pjesë të qytetit uji pijshëm është ndërprerë përkohësisht, sikurse edhe energjia elektrike për shkak të intervenimeve në terren nga e ekipet e shpëtimit të NJPZSH”, ka deklaruar Spahiu.

Spahiu tha se nga ora 10:30 e datës 10.01.2020 deri në ora 08:00 datë 11.01.2020, ka pasur 87 kërkesa për ndihmë për intervenime nga vërshimet, ku janë evakuuar 15 persona (Gjilan 5, Malishevë 2, Uglar 3, Bresalc – Jabuqtë 4 dhe Shillovë – komuniteti Serb – 1.

“Pjesët më të prekura  në qytet janë nga vërshimet e lumit Stanishorka tek lagjja Porodini, rruga qarkore, tek ish-INA, tek pishina Haëai, tek Fabrika Baterive, HIB petrol, ndërsa lumi Mirusha ka dal nga shtrati mbi rrugën qarkore, në Dardani I, Rr. Beqir Musliu. Fshatrat në hyrje të Malishevës, Uglar, Perlepnicë, Livoç i Ulët, Livoç i Epërm, Kuvcë, Bresalc, Kosaqë e shumë vende tjera”, ka njoftuar ai.

Sipas tij, dëmet deri më tani janë shumë të mëdha në infrastrukturë, në pronë shtetërore dhe private.

“Ekipet tona të emergjencave ende janë në terren, duke ofruar ndihmën me gjitha mjetet në dispozicion dhe bëjmë thirrje të gjithë qytetarëve që gjatë të reshurave dhe vërshimeve, t’i shmangin lëvizjet në rrugë dhe për raste urgjente për evakuim apo rrethanë tjetër të kontaktojnë ne numrat emergjent, 193 dhe 112”, ka deklaruar drejtori për Mbrojtje dhe Shpëtim në Gjilan, Sami Spahiu.

(Kosova Sot Online)