Lexoni edhe:
Dy të dënuarit me burg të përjetshëm në rastin ‘Monstra’ strehohen në Kosovë
Gjenden shenja jete në një thellësi që mendohej se nuk ekzistonte
Në një pus të ndërtuar për qëllime kërkimore si pjesë e projektit kinez Continental Scientific Drilling (CCSD), një nga puset më të thella në botë në tokë, janë zbuluar mikrobe në një thellësi prej rreth 5 kilometrash nga sipërfaqja e tokës.
Kjo është thellësia më e madhe në të cilën janë gjetur ndonjëherë format e jetës.
Deri më tani, thellësia më e madhe në të cilën ishin gjetur organizmat e gjallë ishin 3.6 kilometrat e një miniere ari në Afrikën e Jugut, ku ishin gjetur krimba të vegjël nematodë.
Ekipi i udhëhequr nga Hailiang Dong i Universitetit Kinez të Gjeoshkencave dhe Li Huang i Akademisë Kineze të Shkencave kanë zbuluar tani qelizat bakteriale në thellësi më të mëdha.
Në një pus të thellë 5.1 km të hapur në Kinën lindore, studiuesit gjetën ADN-në e atyre qelizave dhe rezultatet u botuan në revistën Geobiology.
Të provuarit se qelizat janë të gjalla do të jetë një sfidë, pasi ne e dimë nga studimet e mëparshme që mikrobet që jetojnë thellë nën sipërfaqe shpesh veprojnë në një shkallë kaq të ngadaltë kohore saqë tregojnë shumë pak nga “sinjalet” tipike të jetës, siç janë lëvizja ose riprodhimi.
Por ka disa arsye për të besuar se mikrobet e sapogjetura janë me të vërtetë të gjalla. Sipas shkencëtarëve, është e mundur që ato mikrobe të formojnë një komunitet të gjallë. Në këtë pikë, është e mundur që mikrobe të tjera mund të gjenden më thellë në pjesë të tjera të botës.
Jeta në 5 kilometra thellësi në të njëjtin pus duket e pamundur, për shkak të temperaturave shumë të larta, ku u regjistruan 137 ° C. Sipas shumicës së biologëve përtej 122 ° C organizmat nuk janë në gjendje të jetojnë, por sipas llogaritjeve të Dong dhe Huang, jeta mund të ekzistojë deri në 150 ° C, një hipotezë e pranueshme me mundësinë që bakteret të jetojnë “pa problem” në 137 ° C.
Sipas Barbara Sherëood Lollar nga Universiteti i Torontos në Kanada, temperatura mund të mos jetë i vetmi parametër që do të merret në konsideratë për të kufizuar jetën nën tokë. “Unë mendoj se kufijtë në fakt janë për shkak të një ndërveprimi kompleks midis një larmie parametrash të ndryshëm, duke përfshirë temperaturën, presionin dhe natyrën fizike të shkëmbinjve, porozitetin e tyre dhe ujin që hyn në sistem”.
Zbulimi i jetës në këtë thellësi ka gjithashtu pasoja për kërkimin e jetës jashtëtokësore.
“Në astrobiologji ne përcaktojmë banueshmërinë si një mjedis që mund të mbështesë rritjen e të paktën një organizmi të njohur”, thotë Sean McMahon i Universitetit të Edinburgut.
“Nëse zbulojmë një organizëm të ri që jeton në një temperaturë më të lartë, përkufizimi ynë i banueshmërisë do të ndryshojë menjëherë për të akomoduar atë kufi të ri.”
(Kosova Sot Online)
