Kryetarët e komunave kundërshtojnë masat shtesë ndaj COVID-19

  • E.K /
  • 04 March 2021 - 12:08
Kryetarët e komunave kundërshtojnë masat shtesë ndaj COVID-19

Drejtori ekzekutiv i Asociacionit të Komunave të Kosovës, Sazan Ibrahimi, në mbledhjen e sotme të Komitetit për Koordinim dhe Vlerësim të Situatës me COVID-19, është shprehur kundër masave shtesë mbrojtëse ndaj pandemisë.

Ibrahimi ka thënë se gjendja me pandeminë në komuna është e menaxhueshme, dhe se kryetarët e komunave shprehen kundër masave shtesë.

“Në kontaktet që i kemi pasur me kryetarët e komunave, theksohet se në nivel lokal situata është e menaxhueshme. Kryetarët kërkojnë që të vazhdohet me masat aktuale dhe të mos vazhdohet me masa shtesë. Kategorizimi i komunave në bazë të ngjyrave është vlerësuar si i suksesshëm dhe kryetarët kërkojnë që të vazhdoj me të njëjtin kategorizim”, ka thënë ai.

Ibrahimi është shprehur se besojnë që me një koordinim më të mirëfilltë me nivelin qendror, neglizhenca ndaj moszbatimit të masave do të ndryshojë.

(Kosova Sot Online)