Lajmi i shumëpritur, po i vjen fundi shpejt pandemisë
Mjeku kosovar që jeton dhe vepron në Gjermani, Fahri Beqa, thotë se po vie fundi i pandemisë.
"E thashë më 8 shkurt por dhe para 6 ditësh që fundi i pandemisë dhe kthimi i normalitetit të plotë, të paktën në Gjermani dhe në shtetet e zhvilluara është shumë afër. Sepse të gjitha faktet shkencore, gjendja aktuale në spitale dhe klinika, furnizimi me vaksina dhe fushata intenzive e vaksinimit e tregojnë këtë", tha Beqa.
Mjeku shtoi se sot në mëngjes ky është lajmi numër 1, në mediat gjermane.
Sipas tij shefi i kabinetit të kancelares Merkel, mjeku Helge Braun, për herë të parë sot e ka thënë hapur, që deri në verë jeta do t'i kthehet normalitetit të plotë, dhe do të ketë heqje të të gjithave masave kufizuese.
Nga muaji Prill dhe Maj sipas kryetarit të komisionit të vaksinimit në Gjermani (STIKO) do të ketë më shumë vaksina se sa që mund të kryhet vaksinim. Të vaksinuarit, të shëruarit dhe ata që testohen vazhdimisht mund t'i kthehen normalitetit edhe më herët.
Kthimin në normalitet mund t'a pengojnë dy gjëra: 1. nëse kompanitë e prodhimit të vaksinave nuk i zbatojnë planet e parashikuara për furnizim me vaksina, dhe 2. nëse paraqiten variante të reja agresive dhe imunorezistente ndaj vaksinave aktuale. Mirëpo edhe në këtë rast përshtatja e vaksinës kundër varianteve të reja është shumë më e lehtë në krahasim me zbulimin e tyre.
"Ajo çfarë duhet të bëhet në Kosovë tani (nëse ende nuk është bërë) është plani konkret i vaksinimit, prioritizimi i kategorive të personave që do të vaksinohen, krijimi i kushteve logjistike dhe trajnimi i stafit për formën e aplikimit të secilës vaksinë", tha mjeku Fahri Beqa.
Sipas tij vaksina nga muaji maj e tutje do të ketë mjaftueshëm edhe për vendet e treta, sepse ky është obligim i detyrueshëm i vendeve të zhvilluara dhe institucioneve të tyre.
Sepse paraqitja e një varianti të ri të Coronavirusit në një vend të pazhvilluar në një skaj të botës, rrezikon të shpërndahet pastaj në tërë botën. Kjo tanimë u vërtetua kësaj here, kur nga qyteti i Wuhan në Kinë u përfshi i tërë globi. Nuk thuhet kot që "Bota është një fshat global".
(Kosova Sot Online)
