Lexoni edhe:
Gastronomët bëjnë thirrje që sonte në ora 20:00 të fiken dritat dhe muzika nëpër lokale
Mercenari skocez që do të vriste Pablo Escobarin
Në vitin 1989, një ekip mercenarësh britanikë, i udhëhequr nga skocezi Peter McAleese, udhëtoi në Kolumbi për të vrarë njeriun më të rrezikshëm në botë.
Pablo Escobar ishte lideri i kartelit të Medellin dhe një nga personat më të pasur në botë. Ai njihej si prodhuesi dhe shpërndarësi më i madh i kokainës në botë, përgjegjës për 80% të tregtisë së kësaj lënde narkotike në atë kohë.
Skocezi McAleese u pajtua nga një rival i Escobar dhe në një dokumentar të ri me titull “Killing Escobar” (Të vrasësh Escobarin), tregohet historia e misionit që dështoi dhe njeriut pas tij. Regjisori David Whitney thotë se McAleese ishte një “njeri i ndërlikuar dhe i trazuar”.
Vetë mercenari, i cili sot është 78 vjeç, tregon në dokumentar se është stërvitur nga ushtria për të vrarë, por instiktin vrasës e ka marrë nga Gllasgou. Ai kujton se hyri në ushtri në moshën 17-vjeçare për të kanalizuar egërsinë që e karakterizonte. Pasi la ushtrinë britanike, ai e kishte të vështirë që të gjente punë dhe vendosi që të shkonte mercenar në konflikte të armatosura në Angola dhe Zimbabve. Aty njohu personin që i ofroi misionin për të vrarë Pablo Escobar.
“Nuk të kërkon njeri që të vrasësh Escobarin nëse nuk ke eksperiencën e duhur. Nuk e kisha fare problem që ta vrisja atë njeri. Nuk e pashë kurrë si një njeri, por si një shënjestër. Krijuam një ekip prej 12 personash, disa i njihja dhe disa m’i rekomanduan. Shpenzimet na i mori përsipër të gjitha karteli i Calit, madje na paguante edhe 5000 $ në muaj. Qëndruam në një fermë larg qytetit Cali, që të mos binim në sy. Na pajisën me shumë armë, ishte si Viti i Ri për ne. Kishim gjithçka që na duhej. U stërvitëm shumë për misionin, por vetëm unë dhe një person tjetër e dinim se kë duhej të vrisnim”, tregon McAleese.
Ditën e sulmit, gjithçka u shkatërrua. Mercenarët do të shkonin me helikopter te ferma e Escobarit, por helikopteri ku udhëtonte McAleese ra në Ande, duke vrarë pilotin dhe duke plagosur skocezin. Kur Escobari mori vesh për planin e vrasjes së tij, dërgoi njerëz në mal për të gjetur mercenarët. Por McAleese arriti që të largohej dhe të shpëtonte.
“Nëse do më kishte kapur Pablo, do të kisha një vdekje të gjatë dhe shumë të dhimbshme”, tregon skocezi.
Ndërkohë, Pablo Escobar u vra nga autoritetet në vitin 1993, kur ishte në arrati./A2CNN
(Kosova Sot Online)
