Lexoni edhe:
Si raportuan mediat gjermane për zgjedhjen e Kurtit kryeministër
Nisin hetimet kundër shefit të shërbimit sekret malazez, dyshohet se ka zbuluar të dhëna të klasifikuara
Prokurorët në Mal të Zi kanë thënë se kanë nisur hetime preliminare rreth pretendimeve për zbulimin e informacioneve të klasifikuara nga shefi i Agjencisë për Siguri Kombëtare, Dejan Vuksiq.
“Rasti është në fazën preliminare”, tha zëdhënësja e Zyrës së Prokurorit të Lartë Shtetëror në Podgoricë, Lepa Medenica.
Kryetari i Partisë Socialdemokrate në opozitë dhe anëtari i Komisionit Parlamentar për Siguri dhe Mbrojtje, Rasko Konjeviq, javën e kaluar pretendoi se Vuksiqi e ka shkelur ligjin për të dhënat sekrete dhe ka bërë kompromis me informata të klasifikuara të një vendi aleat të NATO-s duke ndarë të dhëna sekrete me anëtarët tjerë të komisionit më 19 mars.
Sipas zëvendëskryeministrit të ngarkuar me çështjet e sigurisë, Dritan Abazoviq, Vuksiqi “bëri një gabim” duke zbuluar të dhëna sekrete, shkruan Free Europe, transmeton Gazeta Express.
Megjithatë, kryeministri malazez, Zdravko Krivokapiq, e mbrojti shefin e shërbimit sekret të dielën, duke thënë se gjatë takimit të Komisionit për Siguri dhe Mbrojtje ai ka zbuluar të dhëna nga një dokument i brendshëm e jo nga një vend anëtar i NATO-s.
Sipas disa raporteve, informacionet e klasifikuara në këtë rast kanë të bëjnë me operativët e CIA-s.
Vuksiqi u zgjodh shef i shërbimit sekret në dhjetor të vitit të kaluar, ndonëse emërimi i tij u kundërshtua fuqishëm nga opozita malazeze, e cila tha se zyrtarët e shërbimit sekret nuk duhet të jenë anëtarë të ndonjë partie politike apo të kenë kryer aktivitete politike.
(Kosova Sot Online)
