Zgjedhja e presidentit – përsëritet raundi i parë i votimit

  • G.G /
  • 03 prill 2021 - 21:33
Zgjedhja e presidentit – përsëritet raundi i parë i votimit

Në sallën plenare të Kuvendit të Kosovës po përsëritet raundi i parë për votimin e presidentit.

Ky raund sipas rregullave nuk arriti të konsumohet pasi votuan vetëm 79 deputet nga 82 deputetë të pranishëm në sallë.

Nga ajo çka parashihet në kutinë e votimit duhet të jenë 80 vota në kuti për të kaluar në raundin e dytë.  

Sipas Kushtetutës, në garë për president duhet të jenë të paktën dy kandidatë, të cilët paraprakisht duhet të sigurojnë nënshkrimet e të paktën 30 deputetëve.

Në garë për president janë Vjosa Osmani dhe Nasuf Bejta.

Që prej 5 nëntorit, 2020, Kosova është me ushtrues detyre të presidentit, pasi Hashim Thaçi ka dhënë dorëheqje nga kjo pozitë, pas konfirmimit të aktakuzës për krime lufte dhe krime kundër njerëzimit nga Dhomat e Specializuara në Hagë.

Në Kosovë zgjedhjet parlamentare janë mbajtur më 14 shkurt, dhe më 22 mars, 2021 u konstituua Kuvendi dhe po të njëjtën ditë u zgjodh edhe Qeveria e re e Kosovës në krye me Albin Kurtin e Lëvizjes Vetëvendosje. Qeveria e tij u mbështet nga 67 deputetë.

Për zgjedhjen e presidentit, në dy votimet e para nevojiten dy të tretat e votave e që i bie 80 vota të deputetëve.

Ndërkaq, në raundin e tretë, president zgjidhet ai që merr shumicën e thjeshtë prej 61 deputetësh, por në të tri votimet duhet të marrin pjesë të paktën 80 deputetë.

Nëse edhe raundi i tretë dështon, vendi shkon në zgjedhje të jashtëzakonshme të cilat duhet të mbahen brenda 45 ditësh.

(Kosova Sot Online)