Lexoni edhe:
Publikohet programi i plotë i Qeverisë Kurti
Programi qeverisës 4-vjeçar i Kurtit: Nuk jepet ndonjë datë e caktuar për liberalizimin e vizave
Qeveria Kurti, në programin 4-vjeçar qeverisës, në pjesën për liberalizimin e vizave, nuk kanë dhënë ndonjë datë të caktuar për liberalizimin e vizave, duke e cilësuar dhënien e datave si gabim nga qeveritë e kaluara.
“Qeveria e Republikës së Kosovës nuk do të bëjë gabimet e së kaluarës duke dhënë data të gabuara. Me ndihmën e partnerëve tanë ndërkombëtarë do të punojmë me qeveritë e shteteve që ende janë skeptike që të arrijmë liberalizimin e vizave për qytetarët tanë sa më parë që të jetë e mundur”, thuhet në programin qeverisës.
Në anën tjetër, aty thuhet se Kosova i ka plotësuar të gjitha kushtet për liberalizim të vizave.
“Kosova i ka plotësuar të gjitha kushtet e kërkuara për liberalizimin e vizave. Shumica dërrmuese e shteteve anëtare të BE-së, Komisioni i BE-së dhe Parlamenti Evropian e mbështesin dëshirën e qytetarëve të Kosovës për të mos mbetur vendi i vetëm i izoluar në Ballkan. Janë disa nga qeveritë e shteteve anëtare të BE-së, të cilat ende hezitojnë”, potencohet tutje në program.
Ndërkaq, në politikën e jashtme, përmendet edhe koordinimi me SHBA’të, gjë e cila nuk është vërejtur në draft-programin qeverisës të Kurtit, për të cilën ka marrë edhe kritika.
“Politika e jashtme e Republikës së Kosovës synon forcimin e subjektivitetit ndërkombëtar të Republikës dhe për arritjen e këtij synimi do të jetë e pavarur, serioze, e parashikueshme dhe e guximshme, si dhe bashkëpunuese me aleatët e miqtë tanë – ShBA-të dhe vendet e BE-së”, thuhet në pjesën e programit politik për politika të jashtme.
(Kosova Sot Online)
