Ministria e Shëndetësisë sqaron pse nuk i janë vazhduar kontratat stafit mjekësor

  • E.K /
  • 18 June 2021 - 12:04
 Ministria e Shëndetësisë sqaron pse nuk i janë vazhduar kontratat stafit mjekësor

Ministria e Shëndetësisë përmes një komunikate për media ka sqaruar pse nuk janë vazhduar kontratat e stafit mjekësor.

MSH përmes kësaj komunikate ka informuar se nuk i kanë ndërprerë kontratat e stafit mjekësor dhe operacional të cilët janë angazhuar përmes Projektit të Shëndetësisë Kosovare dhe të financuar nga huamarrja e Bankës Botërore, por se të njëjtat kanë përfunduar sipas kohëzgjatjes që kanë pasur.

Po ashtu në komunikatë thuhet se kontratat e nënshkruar për stafin mjekësor të angazhuar gjatë pandemisë COVID-19 kanë përfunduar shumica e që disa përfundojnë më datë 21 qershor të këtij viti dhe se të njëjtat nuk mund të zgjatet, për shkak se në PSHK nuk është akoluar buxhet për këtë qellim.

Komunikata e plotë e Ministrisë e Shëndetësisë:

Ndërlidhur me informatat e ndryshme rreth kontratave të stafit mjekësor dhe operacional, të angazhuar përmes Projektit të Shëndetësisë Kosovare (PSHK) dhe të financuar nga huamarrja e Bankës Botërore, Ministria e Shëndetësisë informon publikun se nuk ka bërë ndërprerjen e kontratave të këtij stafi, por se të njëjtat kanë përfunduar sipas kohëzgjatjes që kanë pasur.

MSh informon se kontratat e nënshkruara për stafin mjekësor (mjekë, infermierë, teknikë të laboratorit, inspektorë dhe personel mbështetës teknik), të angazhuar gjatë pandemisë COVID-19 kanë përfunduar shumica, disa përfundojnë me datë 21 qershor 2021 dhe se të njëjtat nuk mund të zgjaten, për shkak se në Projektin e Shëndetësisë Kosovare nuk është alokuar buxhet për këtë qëllim.

Angazhimi i stafit mjekësor dhe operacional është bërë duke u thirrë në Ligjin për parandalimin dhe luftimin e pandemisë COVID-19, në territorin e Republikës së Kosovës, i cili lejon angazhim të përkohshëm për nevoja urgjente.

Situata aktuale epidemiologjike tani është shumë më e qetë dhe të dhënat nga raportet ditore të Shërbimit Spitalor dhe Klinik Universitar të Kosovës, tregojnë se numri i pacientëve me COVID-19, aktualisht në trajtim është shumë më i vogël se në kohën e angazhimit të këtij stafi, një pjesë e të cilit kanë qenë të angazhuar jo në shërbime mjekësore, por në administratën e MSh-së.

Sipas raportit të 24 orëshit të fundit, në QKUK dhe në spitalet e përgjithshme të vendit janë gjithsej 77 pacientë në trajtim (për COVID-19), prej të cilëve të konfirmuar me COVID-19 janë gjithsej 28 pacientë.

Prandaj, MSh konsideron se aludimet në media dhe në forma të tjera për ndërprerje të kontratave nga ana e këtij stafi, për kontrata të përfunduara nuk janë korrekte dhe të vërteta.

(Kosova Sot Online)