Bajrami: Qeveria Kurti me pakon e ringjalljes ekonomike do t’i blejë votat gjatë fushatës

  • A.P /
  • 04 August 2021 - 23:20
Bajrami: Qeveria Kurti me pakon e ringjalljes ekonomike do t’i blejë votat gjatë fushatës

Ridizajnimi i një pakoje të re që mundëson ringjalljen ekonomike të vendit, po shihet si mundësi për keqpërdorim të buxhetit nga ana e Qeverisë “Kurti 2” e që për qëllim ka blerjen e votave në prag të Zgjedhjeve Lokale 2021.

Kështu të paktën po konsideron ish-ministrja e financave, Hykmete Bajrami e cila ka ngritur këto shqetësime.

“Ajo çka ne druajmë, edhe sigurisht që do të ndodhë, po e them këtu në studion tuaj, dhe mbajë përgjegjësi për këtë deklaratë. Unë druaj që këta janë duke planifikuar që të gjitha këto miliona, t’i shpenzojnë gjatë fushatës së zgjedhjeve lokale,” – tha ajo.

Ishte kryeministri i Kosovës, Albin Kurti ai i cili dy ditë më parë (2 gusht 2021) kishte njoftuar se rishikimi i buxhetit ia kishte mundësuar Qeverisë së tij që ta krijojë një pako të re e cila mundëson ringjalljen ekonomike të vendit, por nuk tregoj se kur do të nisë zbatimi i saj.

Kjo sipas Bajramit ia jep mundësinë Qeverisë “Kurti 2” që ta futë në zbatim në kohë të fushatës elektorale.

“Ajo çka po them është se pakoja për ringjalljen ekonomike, të fillojë të zbatohet në kohën e fushatës elektorale. Të shpërndahen subvencionet dhe të bëhen shtesat e fëmijëve, të paguhen lehonat, të kemi edhe ndonjë rritje ndoshta të pensioneve dhe të gjitha të tjerave. Kjo i bie që duke bërë gjëra të tilla në kohë të fushatës, në fakt ajo çfarë po bënë është që po e keqpërdorë buxhetin e shtetit për të blerë vota.” – tha Bajrami.

Kujtojmë që tri javë më parë, Qeveria e Kosovës ndau 420 milionë euro për ringjalljen ekonomike, në kuadër të së cilës hyjnë edhe bonot e diasporës.

Ministri i Financave, Punës dhe Transfereve, Hekuran Murati pat treguar se kriteret, afatet dhe planet e operimit të masave për pakon e ringjalljes ekonomike do të procedoheshin sipas procedurave dhe vendimeve të veçanta nga ana e ministrisë që ai e drejton.

(Kosova Sot Online)