Lexoni edhe:
Nis mbledhja urgjente e Këshillit të Sigurisë Kombëtare
Ja pse i kemi 36 të vdekur brenda ditës
Kosovarët nuk hoqën dorë nga dasmat tradicionale që bashkojnë qindra njerëz në një vend. Planet e çifteve për dasmë u shtynë më parë, por vetëm për t’u realizuar këtë verë me leje të ministrit të Shëndetësisë, Arben Vitia, i cili edhe vetë mori pjesë në njërën nga to. Tash, rezultati është tragjik. 36 të infektuar me koronavirus vdiqën gjatë 24 orëve të fundit dhe spitalet janë mbushur me pacientë që nuk po mund të marrin frymë sa duhet. Që një i infektuar të shtrihet në spital, duhet të ketë fat në mos lirohet ndonjë vend, përveçse imunitet për të mbërritur gjallë deri atje.
Pandemia nuk arriti të bënte më shumë sesa t’i shtyente për pak kohë disa dasma në Kosovë. Pasi në një ditë vere ministri i Shëndetësisë, Arben Vitia vendosi që ta lejonte mbajtjen e dasmave dhe të shkonte edhe vetë në njërën prej tyre, shumë kosovarë – fatkeqësisht – menduan se fituan nga vendosmëria e tyre për të mos e ndryshuar mënyrën e organizimit të këtyre ahengjeve. Vendimi i Vitisë u bë tragjik.
Deri në 500 ftesa për dasma u bënë, ndërsa varianti Delta i koronavirusit, për të cilin kishte paralajmëruar e gjithë bota, kishte gjetur terren ideal në vendin e vogël të Ballkanit. Mërgimtarët, që konsiderohen jetikë për Kosovën, nuk patën asnjë kufizim në atdheun e tyre. Dasmat, të cilat shumë kosovarë në mërgim tradicionalisht i mbajnë në Kosovë, rezultuan fatkeqe edhe për shumë prej tyre, të cilët nuk i shpëtuan koronavirusit.
Pasi rastet ditore me koronavirus filluan të rriteshin, ministri i Shëndetësisë, Arben Vitia gjithashtu nxitoi të merrte pjesë në një dasmë. Vallëzoi i kapur dorë për dore mes njerëzve, të cilëve për muaj me radhë nga konferencat përpara ministrisë u kishte thënë të mbanin distancë nga njëri-tjetri e të mos i shtrëngonin duart kur takoheshin. Aty pranë këndonte përfaqësuesi i Odës së Hotelierëve, Afrim Muqiqi, i cili pas më shumë se një viti duke u ankuar, më në fund dukej i lumtur që ministri e kishte përmbushur secilën kërkesë absurde të tij.
Vetëm kur nisi të dilte sterrë rezultati i kësaj maskarade, me rastet ditore që filluan të rriteshin, ministri Vitia vendosi që t’i ndalonte dasmat dhe funksionimin e klubeve të natës. Këto të fundit, përpara se ministri t’ua ndalonte funksionimin, veçse e kishin mbyllur sezonin e ndejave ku mblidheshin qindra e mijëra njerëz.
Sot, që një i infektuar me Covid të shtrihet në spital duhet të ketë fat, përveçse imunitetin e nevojshëm për të mos vdekur rrugës për atje. Duhet të jetë liruar ndonjë vend menjëherë pasi i infektuari të ketë mbërritur në spital. Për ata të cilët nuk kanë fat të gjejnë një shtrat të lirë në spital, familjarët duhet të gjejnë oksigjen nëpër pompa të benzinës apo kudo që edhe ndonjë punonjës i emergjencës së spitalit mund t’i sugjerojë të kërkojnë.
Drejtori i Shërbimit Spitalor Klinik Universitar të Kosovës, Valbon Krasniqi tha dje se po detyrohen të organizojnë shtretër shtesë nëpër klinika.
“Po na duhet të organizojmë shtretër shtesë, të kërkojmë hapësira të tjera për të shtuar këto kapacitete. Ne nuk mund të garojmë me virusin, se sa mund të infektojë virusi. Ne nuk duhet të kërkojmë shtretër shtesë, por duhet ta ndalim virusin”, tha ai.
Statistikat e nxjerra nga Universiteti “John Hopkins” tregojnë se Kosova ka dështuar në menaxhimin e pandemisë dhe vaksinimin e popullsisë.
Grafikat e publikuara nga ky Universitet paraqesin numrin e rasteve të konfirmuara me COVID-19. Me mbi 12 mijë të infektuar për periudhën nga 3 deri më 28 gusht, statistikat tregojnë se Kosova radhitet e para me më së shumti raste të reja me COVID-19.
Edhe për numrin e viktimave të regjistruara gjatë kësaj kohe Kosova është e para me mbi 70 viktima, duke lënë pas Spanjën, Francën, Anglinë e Italinë.
Gazeta e njohur zvicerane, SonntagsZeitung ka shkruar të shtunën si Zvicra ia pa sherrin Kosovës me rritjen e rasteve të reja me koronavirus. Në një artikull të gjatë, kjo gazetë shpjegoi se si shpërtheu vala e radhës e Covid-19 në Kosovë gjatë verës dhe se si u gjend e papërgatitur Zvicra për mërgimtarët që u kthyen atje pas një pushimi pa asnjë kufizim në Kosovë.
Në spitalet zvicerane, të kthyerit nga Kosova aktualisht përbëjnë një pjesë të konsiderueshme të pacientëve me koronavirus, siç shpjegoi të martën grupi punues federal i koronavirusit.
Pas keqmenaxhimit fatal, deri më sot, Kosova nuk ka qenë në gjendje ta ngadalësojë rritjen eksponenciale të rasteve të reja me koronavirus, dhe rrjedhimisht rritjen e frikshme të numrit të viktimave.
Ministri i Shëndetësisë, Arben Vitia veçse e ka njoftuar tërheqjen nga kjo përpjekje. Ai pas gjithë kësaj ka vendosur ta braktis shëndetësinë. E ka shpallur kandidaturën për kryetar të Prishtinës. Zgjedhjet mbahen pas më shumë se një muaji dhe ai tashmë e ka nisur fushatën.
(Kosova Sot Online)
