Lexoni edhe:
Nuk mund të ndërtohet sundimi i ligjit nga parti politike që strehojnë persona të inkriminuar!
Përpjekjet për ta mposhtur virusin, brenda klinikës Infektive në QKUK
Disa qindra metra larg qendrës së Prishtinës, në Infektivë, bëhet jetë krejt tjetër. Pacientët e infektuar luftojnë për të marrë frymë e për të mbijetuar.
E mbushur me pacientë, por nuk dëgjohet as edhe një zë në korridoret e Klinikës Infektive. Gati se të gjithë janë të lidhur për aparatet e frymëmarrjes, e disa të tjerë të lidhur në aparate tjera, të pavetëdijshëm e të lodhur.
Familjarë të frikësuar që presin të kalojë çdo minut, orë e ditë e ta mposhtin së bashku këtë virus.
Infektiva është e mbushur me pacientë. Nuk ka më as edhe një vend të lirë, as edhe një shtrat të lirë, përkundër rasteve të rënda që po kërkojnë hospitalizim në të.
Shifrat sa i përket koronavirusit në vend ditët e fundit kanë shënuar rritje drastike.
Aktualisht janë 26 mijë e 525 persona të infektuar me këtë virus. Ndërsa dje, Ministria e Shëndetësisë ka raportuar 20 raste të reja vdekjesh, bashkë me 932 raste pozitive dhe 962 të të shëruarve.
Shërbimi Spitalor dhe Kllinik Universitar i Kosovës, ka njoftuar dje qytetarët se për shkak të rritjes së numrit të spitalizuarve me COVID-19, në klinikat e QKUK-së, me Vendim të Komitetit për ngritje të gatishmërisë dhe menaxhimit të situatës me COVID-19, nga data 31 gusht 2021, pezullohet përkohësisht puna në ambulancat specialistike në QKUK.
“Hapësirat e ambulancave specialistike do të shërbejnë për spitalizim të pacientëve me COVID-19”, është thënë në njoftim.
Qytetarëve u është kërkuar që në QKUK dhe në spitalet rajonale, të drejtohen vetëm për rastet urgjente.
Në të njëjtën kohë është apeluar që të vaksionihen qytetarët dhe të respektojnë masat anti-Covid, në mënyrë që sa më shpejt të tejkalohet kjo situatë.
(Kosova Sot Online)
