Presidentja Osmani për ftesën e Listës “Guxo” dhe Alternativës: Tek e fundit, si e para vendit, unë vendosi kë ta ftoj

  • E.K /
  • 13 September 2021 - 20:24
 Presidentja Osmani për ftesën e Listës “Guxo” dhe Alternativës: Tek e fundit, si e para vendit, unë vendosi kë ta ftoj

Presidentja Vjosa Osmani iu është kundërpërgjigjur partive opozitare lidhur me ftesat e subjekteve politike në takimin konsultativ që mbajtën me të.

Osmani, në një konferencë për medie pas takimit, ka thënë se ka ftuar të gjitha subjektet politike parlamentare.

“Përveç këtyre e kam ftuar edhe z. Pacolli, i cili është vetëm një deputet, përveç kësaj janë ftuar të gjitha partitë e përfaqësuara nga pakica. Tek e fundit, si e para vendit,  unë vendosi se kë ta ftoj në takimin me mua”, deklaroi ajo.

Reagimi i saj vjen pas deklarimeve të partive opozitare pas përfundimit të takimit konsultativ me presidenten, të cilët e konsideruan të papranueshme ftesën e subjekteve politike që nuk janë pjesë e garës zgjedhore lokale.

“Në fillim shprehëm rezervat tona për pjesëmarrjen e dy partive të pacertifikuara në këtë takim”, deklaroi ndër të tjera Abdixhiku.

“Ato [Lista Guxo, Alternativa] e patën fjalën, ne t’iu them të drejtën e shprehëm habinë për prezencën e tyre sepse Lista Guxo dhe Alternativa nuk janë parti politike të certifikuara për këtë proces zgjedhor e as për procesin e vitit 2017, bile Lista Guxo nuk figuron as në regjistrin e partive politike fare. Ka qenë në autoritetin e presidentes, ajo ka vendosur t’i ftojë, nuk mund t’i komentojë raportet e tyre personale”, është shprehur Krasniqi.

(Kosova Sot Online)