Bislimi: Hapja e arkivave shtetërore të Serbisë na mundëson të dimë saktë për varrezat masive

  • G.G /
  • 21 shtator 2021 - 14:09
Bislimi: Hapja e arkivave shtetërore të Serbisë na mundëson të dimë saktë për varrezat masive

Zëvendëskryeministri i Kosovës, Besnik Bislimi në Komisionin për Persona të Pagjetur ka folur lidhur me hapjen e arkivave shtetërore të Serbisë. Bislimi tha para deputetëve se në ato arkiva ka informata që e saktësojnë vendndodhjen e varrezave masive në territorin e Serbisë.

“Për hapjen e arkivave shtetërore të Serbisë, ne besojmë dhe shpresojmë që aty do të gjinden informatat që na saktësojnë vendndodhjen e varrezave masive. Janë edhe dikun 1632 persona të pagjetur pjesa më e madhe e tyre besohet se janë në territorin e Serbisë. Meqë gjithçka ka qenë e organizuar nga logjistika ushtarake dhe policore serbe është e logjikshme të pritet që informacionet të jenë të arkivuara në arkivat shtetërore serbe”, tha Bislimi

Tutje, Bislimi tha se edhe nëse Serbia ka shkatërruar arkivat, hetuesit ndërkombëtarë mund të evidentojnë të njëjtat.

“Unë nuk e përjashtoj mundësinë që Serbia në ndërkohë i ka shkatërruar këto arkiva por për hetues të mirëfilltë ndërkombëtarë është e lehtë që të evidentohen shkatërrime të tilla dhe të arrihet të ndërtohen lidhje e informatave tjera anësore por për ne është e rëndësishme që të mos ketë pengesa zyrtare.Për aq kohë që Serbia insiston që arkivat e tyre të mbeten të mbyllura ne kemi të drejtën që të dyshojmë se aty ka informata të vlefshme për arsye se Serbia një pjesë të arkivave e ka dorëzuar në Hagë por në mënyrë selektive ka vendosur cilat dokumente t’i dërgojë e cilat jo.”, tha Bislimi.

(Kosova Sot Online)