Tensionet për targat, Basha: Gjuha kërcënuese e Beogradit i përket të shkuarës, Kosova e pavarur

  • E.K /
  • 21 September 2021 - 22:25
 Tensionet për targat, Basha: Gjuha kërcënuese e Beogradit i përket të shkuarës, Kosova e pavarur

Kryedemokrati Lulzim Basha ka komentuar tensionet mes Serbisë dhe Kosovës, pasi kjo e fundit vendosi të ndalojë në territorin e saj makinat me targa serbe në kuadër të marrëveshjes së reciprocitetit.

Basha shprehet se gjuha kërcënuese e Beogradit i përket një të shkuare që askush nuk e kthen dot. Ai thekson se Kosova është shtet i pavarur dhe marrëdhëniet mes dy shtetesh sovrane funksionojnë mbi baza reciprociteti.

“Gjuha kërcënuese e Beogradit i përket një të shkuare që askush nuk e kthen dot më! Kosova është shtet i pavarur dhe marrëdhëniet mes dy shtetesh sovrane funksionojnë mbi baza reciprociteti. Kjo është e drejtë e patjetërsueshme e Kosovës. Sa më shpejt ta kuptojë këtë Beogradi aq më mirë do të jetë për Serbinë dhe për marrëdhëniet mes vendeve të rajonit.

Qëndrimet e Beogradit ndaj vendimit legjitim dhe që nuk cenon asnjë marrëveshje të nënshkruar në Bruksel nga qeveria e Republikës së Kosovës, zbulojnë qëllimet e vërteta të Vuçiç dhe fshehjen pas fallsitetit të iniciativës së Novi Sadit”, shkruan Basha.

(Kosova Sot Online)