Orbani i fut hundët në fushatën e shtetit tjetër, e përkrah kryeministrin

Kryeministri i Hungarisë, Viktor Orban, të mërkurën e përkrahu homologun e tij çek, Andrej Babis, në synimin e tij për mandat të ri qeveritar, duke i vënë në pah raportet e ngushta mes udhëheqësve, të cilët e kanë përkrahur njëri-tjetrin në mosmarrëveshjet me BE-në.

Republika Çeke do të mbajë zgjedhje parlamentare më 8 dhe 9 tetor. Sipas anketave, partia e kryeministrit Babis është në epërsi, por disa thonë se ai mund të mbetet pa partnerë për formimin e qeverisë së shumicës.

Partnerët e mundshëm mund t’ia ofrojnë pushtetin një koalicioni mes partisë kryesore opozitare të qendrës së majtë dhe grupeve të qendrës së djathtë, shkruan Reuters.

Në fushatë, i shoqëruar nga homologu hungarez, Babis theksoi se si ai dhe Orbani e kanë bllokuar planin e Komisionit Evropian për t’i shpërndarë azilkërkuesit nëpër vendet e BE-së sipas sistemit me kuota pas krizës së imigrantëve më 2015.

Në anën tjetër, Viktor Orban tha: “Ne në Hungari jemi të gatshëm për të mbajtur bashkëpunim të afërt, miqësor, të shëndoshë me qeverinë e Andrej Babis-it.”

Këtë javë, qeveria çeke u pajtua që të dërgojë 50 policë për të ofruar ndihmë në ruajtjen e kufirit të Hungarisë me Serbinë, të cilin Babis e vizitoi javën e kaluar.

Babis, biznesmen miliarder, është shprehur gjithnjë më i hapur për bashkëpunim me shtetet e Vishegradit dhe sidomos me Orbanin e Hungarisë. Çekia nuk iu bashkua shumicës së vendeve të BE-së këtë vit në një letër proteste kundër legjislacionit hungarez për ndalimin e materialeve promovuese për komunitetin LGBT.

(Kosova Sot Online)