Mehaj beson se shërbimi i detyrueshëm ushtarak është “ëndërr e çdo qytetari të Kosovës”

  • E.K /
  • 02 November 2021 - 11:50
Mehaj beson se shërbimi i detyrueshëm ushtarak është “ëndërr e çdo qytetari të Kosovës”

Shërbimi ushtarak i detyrueshëm është paralajmëruar shpeshherë nga kryeministri i Kosovës, Albin Kurti. Për këtë ka folur sot ministri i Mbrojtjes, Armend Mehaj, i cili në Komisionin për Punë të Jashtme ka thënë se kjo mund të bëhet pasi, sipas tij, interesimi i qytetarëve është i madh për të shërbyer në ushtrinë e Kosovës.

Ai ka thënë se shërbimi në FSK është ëndërr e çdo qytetari të Kosovës.

“Unë besoj se kjo është ëndërr e çdo qytetari të Kosovës, që ta kemi një ushtri të mirëfilltë dhe të jepet mundësia që çdo qytetar të shërbejë në ushtrinë e Kosovës”, tha Mehaj.

Ai tregoi se janë në koordinim me shtetet aleate për të parë mundësinë se në çfarë faze Kosova mund të aplikojë shërbimin ushtarak të obligueshëm.

“Ne jemi në koordinim me partnerët e tjerë për të parë mundësinë se në çfarë faze mund të futet shërbimi ushtarak i obligueshëm në të ardhmen, por duhet të marrim edhe plane konkrete, siç janë shtetet baltike, të cilat kanë kaluar në të njëjtat faza dhe kërcënime siç është Rusia për ta dhe siç jemi ne [të kërcënuar] nga Serbia. Jemi në koordinim e sipër me këto, por e rëndësishme është që çdo veprim që ta marrim të jetë me koordinim me SHBA-në. Interesimi është i madh”, ka thënë Mehaj gjatë raportimit në Komisionin për Punë të Jashtme dhe Diasporë.

Ministri tregoi se nga 400 pozitat që kishin hapur në konkursin e kaluar të FSK-së kishin aplikuar mbi 6000 qytetarë, ndërsa deri tani në konkursin, i cili vazhdon të jetë i hapur për 840 rekrutë, kanë aplikuar mbi 1100 qytetarë, ku prej tyre 100 janë gra, ndërsa shtoi se objektiva kryesore e tij është që të shtojë numrin e përfaqësimit të grave në FSK.

(Kosova Sot Online)