Gashi për rastin e vrasjes së trefishtë në Deçan: Prokuroria Speciale duhej të merrej me rastin

Leutrim Gashi, hulumtues në Institutin e Kosovës për Drejtësi, ka thënë se Prokuroria Speciale do të duhej të merrej me rastin e vrasjes së trefishtë në Deçan, që ndodhi para disa javësh.

“Ajo që ka qenë shqetësuese në ditën kur ka ndodhur vrasja ka qenë mos reagimi me kohë i prokurorit të shtetit që është në ndjekjen penale e që është Prokuroria Speciale… Ligji për Prokurorinë Speciale është i vitit 2008 e përcakton që edhe vrasjen e rëndë si mundësi që kjo prokurori ta marrë në kompetencë, për arsye se ky ligj e përcakton se vrasja e rëndë dhe vrasja është janë si forma të veçanta dhe si alternativë që në rast se rasti dhe forma si ka ndodhur vrasja është e komplikuar atëherë Prokuroria Speciale si organ i specializuar mund ta marrë një rast të tillë në kompetencë, por një gjë e tillë nuk ka ndodhur”, ka thënë Gashi.

Sipas Gashit vrasja ka qenë e planifikuar pasi vendi ku është kryer vepra, ka qenë vend jo shumë i frekuentuar.

“Rasti definitivisht ka mundur të jetë me paramendim dhe që të mos zbulohet pasi kemi të bëjmë me një vend rural,  malor dhe në bazë të asaj që është thënë deri tash person ka qenë i maskuar dhe kjo e vështirëson akoma më shumë zbulimin e rastit”, ka shtuar ai.

Gashi tha se u është dhënë shumë rëndësi deklaratave të kryeministrit e ministrit të Brendshëm, duke e quajtur edhe skandaloze deklaratën e Sveçlës për ultimatumin e dhënë për kryesin e vrasjes së trefishtë.

“Më shumë është duke iu dhënë rëndësi deklaratave të kryeministrit, deklaratave të ministrit që ata të vetmen gjë që duhet të bëjnë është mbështetja për organet e drejtësisë, në këtë rast për organet e ndjekjes e jo që fokus kryesor i opinionit publik të orientohet në këto deklarata. Definitivisht skandaloze është deklarata e ministrit Sveçla që jep ultimatume për personin që e ka kryer veprën, po të ishte kështu atëherë pse të ekzistojë prokurori i shtetit e policia”, ka thënë ai.

Ai shtoi se prokuroria speciale do të duhet ta menaxhonte dhe ta udhëhiqte hetimin e rastit dhe të dilnin më shumë se tre prokurorë në vendin e ngjarjes, pasi sipas tij 72-orëshi i parë i ngjarjes është më i rëndësishmi për grumbullimin e provave që çojnë te të dyshuarit kryesorë.

“Nëse nuk i kushtohet rëndësi e madhe një rasti të tillë në fillim të procedurës edhe fundi nuk mund të sjellë rezultate konkrete”, ka vazhduar ai.

(Kosova Sot Online)