D+ kërkon zgjatjen e afatit për konsultim të Projektligjit për Konfiskim të Pasurisë

  • G.G /
  • 21 December 2021 - 11:36
D+ kërkon zgjatjen e afatit për konsultim të Projektligjit për Konfiskim të Pasurisë

Demokraci Plus po kërkon nga Ministria e Drejtësisë ta zgjasë afatin për konsultime me publikun për Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme.

Përmes një komunikate për media, D+ thotë se MD-ja jashtëligjshëm e ka shkurtuar këtë afat.

“Ministria e Drejtësisë ka vendosur në platformën e konsultimeve publike “Projektligji për Byronë Shtetërore për Verifikimin dhe Konfiskimin e Pasurisë së Pajustifikueshme”, dhe për pranimin e konsultimeve me shkrim ka përcaktuar afatin prej vetëm 11 ditë kalendarike ndërsa llogaritur si ditë punë janë vetëm shtatë 7 ditë, nga data 10 dhjetor deri më 20 dhjetor 2021. Vendosja e një afati kaq të shkurtër për pranimin e komenteve me shkrim nga publiku për një projektligj kaq të rëndësishëm, është në kundërshtim me Rregulloren e Qeverisë nr. 05/2016 për standardet minimale për procesin e konsultimit publik (Neni 9, pika 1.1), ku përcaktohet se organi propozues i projektligjit (në këtë rast Ministria e Drejtësisë), duhet t’i mundësojë publikut kohë të mjaftueshme për komente, jo më pak se pesëmbëdhjetë (15) ditë pune që nga data e njoftimit për hapjen e konsultimit me shkrim”, thuhet në njoftim.

Sipas njoftimit, shkurtimi i afatit për konsultim me publikun për këtë projektligj në 7 ditë pune nga ana e Ministrisë së Drejtësisë, përveçse është në kundërshtim me Rregulloren e Qeverisë, minon besimin e publikut në gjithë procesin e verifikimit dhe konfiskimit të pasurisë së pajustifikueshme.

“Për më shumë, duke pasur parasysh se projektligji në fjalë mbulon një çështje komplekse dhe të rëndësishme e cila po ashtu nuk është rregulluar më herët në Kosovë, projektligji është dashur të lihet për konsultime publike të paktën për pesëmbëdhjetë (15) ditë pune”, thuhet në njoftim.

(Kosova Sot Online)