Lexoni edhe:
Alarmante: Rritet edhe më shumë numri i të infektuarve me COVID-19 në Kosovë
Deputeti i VV’së pas arrestimeve të sotme: Uroj që të arrestohen edhe disa kumarë të tyre në Ferizaj
Deputeti i Lëvizjes Vetëvendosje, Dimal Basha, ka reaguar pas aksionit të sotëm për ndërtimet në Brezovicë, ku u arrestuan shtatë persona, në mesin e tyre edhe dy zyrtarë të Ministrisë së Mjedisit, Planifikimit Hapësinor dhe Infrastrukturës.
Sipas raportimeve të mediave, një prej të arrestuarve është edhe ish-sekretari i kësaj ministrie, Arben Çitaku.
Basha ka shpërndarë lajmin ku raportohet për arrestimin e Çitakut, duke thënë se “ky vend po çlirohet për ditë ngapak”.
Ai i ka bërë thirrje Prokurorisë Themelore të Ferizaj që të vazhdojë me aksione të tilla.
Sipas Bashës, janë “disa kumarë të këtij tipit në Komunën e Ferizajit, që e kanë degradu këtë shehër duke dhanë leje kundërligjshëm”.
“Uroj që prokuroria mos t’ndalet edhe ta vazhdon me disa kumarë të këtij tipit në Komunën e Ferizajit, që e kanë degradu këtë shehër duke dhanë leje kundërligjshëm, ku ndërtesat janë në rrugë, me zero hapësira të gjelbëra, e disa janë aq kriminale sa nuk kanë as vend për kontejnera të mbeturinave. Çlirimi i fundit vie me lidhjen e kriminelave!”, ka shkruar Basha.
Ndryshe, ky aksion ka qenë vazhdimësi e aksionit që ishte zhvilluar më 21 dhjetor të vitit të kaluar. Në këtë aksion ishin arrestuar dhjetë zyrtarë të Komunës së Shtërpcës.
Në mesin e të arrestuarve ishte edhe ish-kryetari i Shtërpcës, Bratisllav Nikoliq.
Ai dyshohet se ka përfituar deri në 1 milion euro për lejet e lëshuara kundërligjshëm për ndërtimin e objekteve në Brezovicë, në Komunën e Shtërpcës.
Të arrestuarit dyshohen për veprat penale: marrje dhe dhënie e ryshfetit, si dhe keqpërdorim i pozitës zyrtare.
(Kosova Sot Online)
