Lexoni edhe:
Qeveria e kishte dhënë premtimin për ta luftuar krimin, qytetarët po e presin veprimin e saj kunder krimit në Gjyqësor e Prokurori!
LDK: Haki Rugova u angazhua pandalshëm në proceset e vështira nëpër të cilat kaloi Kosova
Lidhja Demokratike e Kosovës ka shprehur telegram ngushëllime me rastin e vdekjes së zyrtarit të lartë të kësaj partie, ish kryetarit të Istogut dhe ish nënkryetarit të LDK-së Haki Rugova.
Sipas LDK-së, Rugova për më shumë se tre dekada qëndroi i palëkundur në veprimtarinë e tij atdhetare e politike dhe do të mbetet model i njeriut të urtë e punëtor.
Telegrami i plotë:
Me rastin e ndarjes nga jeta të ish-nënkryetarit të LDK-së, njëherësh edhe ish-kryetarit të komunës së Istogut, z. Haki Rugova, kryetari i LDK-së, Lumir Abdixhiku dërgon këtë telegram ngushëllimi:
“E nderuara familje Rugova,
Me dhimbje të thellë mora lajmin për ndarjen nga jeta të ish-nënkryetarit të LDK-së, ish-kryetarit të komunës së Istogut e të më të dashurit tuaj, Haki Rugova.
Haki Rugova ishte një personalitet dhe veprimtar i dalluar i Lidhjes Demokratike të Kosovës, duke dhënë shembullin e përkushtimit dhe kontributit të jashtëzakonshëm në shtetndërtimin e Kosovës. Ai gjatë gjithë jetës u angazhua pandalshëm në proceset e vështira nëpër të cilat kaloi Kosova. Për më shumë se tre dekada qëndroi i palëkundur në veprimtarinë e tij atdhetare e politike dhe do të mbetet model i njeriut të urtë e punëtor, i afërt dhe bashkëpunues.
Haki Rugova u nda fizikisht nga ne, por vepra e tij do të kujtohet përjetësisht. Ndarja nga jeta e tij lë një zbrastirë të madhe jo vetëm për familjen, po edhe për gjithë qytetarët e Istogut dhe gjithë Kosovës, ndërsa LDK-ja humbi veprimtarin e madh të saj.
Në emrin tim dhe të Lidhjes Demokratike të Kosovës u shpreh ngushëllime familjes, miqve, bashkëpunëtorëve, qytetarëve të Istogut dhe të Kosovës.
Shpirtërisht dhe në lutje jemi me ju në këto çaste pikëllimi!
Qoftë i përjetshëm kujtimi për të!”
(Kosova Sot Online)
