Mediat në Veri raportuan për autobusë me protestues me targa të Serbisë, reagon Lista Srpska

Media lokale nga veriu i Kosovës, ‘Kossev’ raportoi se të paktën 10 autobusë me targa të qyteteve të Serbisë janë futur në Mitrovicën e Veriut për t’iu bashkuar protestës së serbëve lokalë. Ndaj këtij raportimi ka reaguar Lista Serbe duke e quajtur si dezinformim.

Përmes një deklaratë të publikuar në Facebook, Lista Serbe thotë se në protestë kanë marrë pjesë vetëm serbë nga Kosova.

“Ne dënojmë fuqishëm dezinformimin e publikuar nga portali Kossev dhe mediat tjera shqiptare për arritjen e autobusëve nga Serbia me qytetarë që kanë marrë pjesë në Protestë. Në protestën e sotme poaqësore kanë marrë pjesë qytetarët serbë nga Kosova. Të pavërtetat që po plasohen kanë pasoja të rrezikshme dhe shërbejnë si alibi dhe shkak për përdorimin e dhunës ndaj njerëzve që janë paqësorë dhe shprehin me protesta të drejtat bazike. Ne u bëjmë thirrje qytetarëve që të mbajnë qetësinë dhe të mos bien në provokime dhe gënjeshtra që po ndodhin në këtë moment senzitiv”, thuhet në deklaratë.

Protestat e serbëve në Mitrovicë të Veriut dhe në Graçanicë janë organizuar për të kundërshtuar mosmbajtjen e zgjedhjeve të Serbisë në Kosovë.

Në anën tjetër Shtetet e Quint-it kanë shprehur shqetësim se në protestat e paralajmëruara sot nga qytetarët serbë në veri të Kosovës mund të ketë rrezik për përshkallëzim të dhunës.

Në një deklaratë të përbashkët, shefat e misionit të Francës, Gjermanisë, Italisë, Mbretërisë së Bashkuar, Shteteve të Bashkuara dhe Bashkimit Evropian kanë bërë thirrje që protestat e sotme të jenë paqësore dhe të mos kalojnë në dhunë.

“Qytetarët kanë të drejtën e tubimit paqësor si dhe përgjegjësinë për të siguruar që tubime të tilla të jenë paqësore dhe të mos bëhen të dhunshme. Ndër vlerat tona të përbashkëta demokratike janë e drejta për tubime paqësore dhe për të dëgjuar zërin tonë, të drejta të cilat zbatuesit e ligjit janë përgjegjës për t’i mbrojtur. Forcat e rendit kanë detyrimin për të ruajtur rendin publik dhe duhet ta bëjnë këtë pa cenuar parimet demokratike të fjalës së lirë dhe tubimit”.

(Kosova Sot Online)