Aksioni “Transporti 2”, çfarë sekuestroi policia dje në aksionin në veri

11 qytetarë kanë përfunduar dje në prangat e policisë pas një aksioni të titulluar “Transporti 2” kundër kontrabandës, në regjionin e Ferizajt dhe atë të Mitrovicës së Veriut. Sekuestrimi i tri automjeteve dhe i një mori mallrash komerciale ishte bilanci i aksionit. Por, çfarë u konfiskua dje në veri? Ju sjellim detaje

Duhan refuz, pije alkoolike dhe jo alkoolike, cigare e gjëra ushqimore ishte bilanci i sekuestrimeve nga Policia e Kosovës gjatë një aksioni kundër kontrabandës në regjionin e Mitrovicës së Veriut dhe Ferizajt dje.

Aksioni me emrin “Transporti 2”, rezultoi i suksesshëm sipas policisë, pasi nga kontrollimi i katër automjeteve aty u gjetën sasi e konsiderueshme e mallit komercial që dyshohet se janë të kontrabanduara.

Lexoni edhe:

Nesër shi e borë, por si do të jetë moti gjatë javës së ardhshme

Kjo pasi ato nuk përmbanin dokumentacion përkatës.E në pranga të policisë përfunduan 11 persona, si dhe u sekuestruan tri automjete që dyshohet se janë përdorur në këtë rast. “Gjate kontrollit në këto katër lokacione dhe në automjetet e ndaluara është gjetur një sasi e konsiderueshme e mallit komercial (gjera ushqimore, pije alkoolike, duhan etj.) mall i kontrabanduar pa dokumentacion përkatës. Në konsultim me Prokurorin e Shteti, malli është konfiskuar nga Dogana e Kosovës dhe janë arrestuar njëmbëdhjetë meshkuj kosovarë nën dyshimin se merreshin me tregti të ndaluar dhe janë sekuestruar tri automjete”, thuhet në njoftim.

Hetimet për këtë rast kanë filluar qysh në fund të vitit 2021, teksa dje policia së bashku me Doganën e Kosovës e kryen aksionin. E lokacionet që u bastisën ishin tre në Shtërpcë, si dhe një kompani në  Lagjen e Boshnjakëve në Mitrovicën e Veriut.  Më poshtë mund të shihni pamjet e mallrave që u konfiskuan dje gjatë aksionit të policisë.

(Kosova Sot Online )