Arrestimet të reja? Flasin nga Gjykata Speciale

Ndaj ish-krerëve të UÇK-së që aktualisht po mbahen në Hagë, ish-presidentit Hashim Thaçi, ish-kryetarit të PDK-së, Kadri Veseli, ish-zëdhënësit të UÇK-së, Jakup Krasniqi dhe ish-komandantit të UÇK-së, Rexhep Selimi, është zgjeruar aktakuza.

Si rrjedhojë e kësaj në media është raportuar se nga ky shtim i aktakuzës në të janë përfshirë edhe 13 pjesëtarë të UÇK-së.

Ky grup, përveç përgjegjësive komanduese, akuzohet edhe për akuza specifike që pretendohet të jenë kryer gjatë dhe pas luftës

Në atë që kanë raportuar mediat thuhet se ky grup, përveç përgjegjësive komanduese, akuzohet edhe për akuza specifike të cilat pretendohet të jenë kryer gjatë dhe pas luftës.

E, si shkas i kësaj brenda pak javësh pritet të arrestohet ky grup prej 13 personave, që përfshin pjesëtarë të Shtabit të Përgjithshëm të UÇK-së, si dhe të zonave operative të Drenicës, Dukagjinit, Nerodimes, Pashtrikut etj.

Lidhur me këtë FrontOnline ka kërkuar përgjigje nga Zyra e Prokurorit të Specializuar në Kosovë.

Nga kjo zyre nuk kanë komentuar se a pritet të ketë arrestime të reja derisa lajmet se do të ketë arrestime i kanë quajtur spekulime.

“Faleminderit për komunikimin tuaj. Sidoqoftë Zyra e Prokurorit të Specializuar nuk komenton spekulimet e mediave”, ka thënë zëdhënësi i Zyrës së Prokurorit të Specializuar në Hagë, Christofer Bennet.

Shtimi i aktakuzës ndaj katërshes së UÇK-së, ka bërë që brenda ditës, më saktësisht më 10 maj të mbahen katër seanca dëgjimore.

Seanca ndaj ish-presidentit të Kosovës, Hashim Thaçi do mbahet në orën 10:00.

Ajo ndaj Kadri Veselit, ish kryetar i Kuvendit do mbahet të martën po ashtu me fillim nga ora 11:15.

Të martën gjithashtu do të mbahen seancat edhe të Rexhep Selimit e Jakup Krasniqit, me fillim prej orës 14:00, respektivisht 15:15.

Ata në këto seanca pritet të deklarohen sërish për fajësinë e tyre në lidhje me akuzat e reja.

Të paktën 39 lokacione janë përmendur si vende ku krerë të UÇK-së pretendohet të kenë kryer vrasje në aktakuzën që Gjykata Speciale ka publikuar për Hashim Thaçin, Kadri Veselin, Rexhep Selimin e Jakup Krasniqin.

Në aktakuzën e publikuar, Specialja ka përmendur shumicën e komunave të Kosovës, ndërsa ka përmendur edhe Kukësin si territor ku janë kryer krimet e pretenduara.

Periudha mbi të cilën rëndon akuza ndaj tyre është mars 1998 deri shtator 1999.

Aktakuza përmend edhe 17 qendra ndalimi, që sipas Speciales, janë shfrytëzuar për torturim të të ndaluarve.

Më 5 nëntor bëhen dy vjet që kur ish-presidenti i Kosovës, Haxhim Thaçi, ish-kryetari i PDK-së, Kadri Veseli, dhe ish-komandanti i UÇK-së, Rexhep Selimi u transferuan për në qendrën e paraburgimit në Hagë.

Ndërsa, më 4 nëntor ishte arrestuar ish-zëdhënësi i UÇK-së, Jakup Krasniqi.

(Kosova Sot Online)