Lexoni edhe:
Gërvalla flet sot për vizitën në Izrael, darkën e Borrellit dhe aplikimin e Kosovës në Këshillin e Evropës
Projektligji për pagën minimale sot në Kuvend, Vetëvendosje pret kundërshtime nga opozita
Kuvendi i Kosovës do të mblidhet sot. Një prej pikave që është në rend dite është edhe shqyrtimi i parë i Projektligjit për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale, procedurat e caktimit të pagës minimale dhe shkallët tatimore në të ardhurat personale vjetore.
Sipas propozimit të Qeverisë, paga minale do të jetë 264 euro bruto, e 250 neto. E nga Lëvizja Vetëvendosje presin që ky propozim të kundërshtohet nga opozita.
Ka qenë deputeti Armend Muja, ai që ka shkruar për këtë punë. Sipas tij, PDK’ja do të kundërshtojë rritjen e pagës minmale me arsyetimin se s’është e lidhurme beneficionet e veteranëve.
E AAK’ja thotë se do ta kundërshtojë me arsyetimin që paga minale s’është 400 euro.
“Unë parashoh kundërshtime nga opozita PDK-LDK-AAK me arsyetime të ndryshme, por realja është kjo – mungesa e guximit politik dhe varshmëria e tyre ndaj biznesit të madh. PDK do të kundërshtoj rritjen minimale me arsyetimin se kinse nuk është e lidhur me beneficionet e veteranëve – kjo nuk qëndon sepse ishte PDK-LDK që e shkoqitën lidhjen pagë minimale-beneficion i veteranëve në një seancë të datës 30.12.2016. Arsyet më reale të kundërshtimit të PDK shfaqen në mbledhjen e Qeverisë Haradinaj të datës 18.04.2019 përmes Ministrave Hamza, Beqaj dhe Hoxhaj – pagën minimale e përcakton vet sektori privat. Nga AAK që në seancën e Kuvendit të datës 17.04.2019 kishte premtuar pagë minimale 239 euro por nuk e kishin realizuar asnjëherë, pres që përmës Besnik Tahirit të vajtoj se pse paga minimale nuk është 400 euro”, ka shkruar Muja.
Ndryshe, Qeveria e Kosovës ka miratuar më 13 prill projektligjin e propozuar nga ministria e Financave që ka të bëjë me plotësimin dhe ndryshimin e ligjeve që i hap rrugë rritjes së pagës minimale në 250 euro neto apo 264 euro bruto.
Ministri Hekuran Murati kishte thënë në mbledhjen e qeverisë se miratmi i projektligjit në qeveri dhe më pastaj në Kuvend do t’i hapë rrugë sjelljes përsëri në qeveri të vendimit për rritjen e pagës minimale në 264 euro bruto.
“Miratimi i këtij projektligji në qeveri e Kuvend i hap rrugë sjelljes në qeveri të vendimit për rritjen e pagës minimale në vlerë prej 264 euro bruto apo 1.5 euro për orë. Ju ftoj që ta mbështesni këtë vendim dhe t’i hapet rrugë miratimit të pagës minimale”, kishte thënë ai.
Projektligji u miratua me shumicë votash nga kabineti qeveritar.
Murati kishte shpjeguar rregullimet që synohen me anë të këtij projektligji që sipas tij ka për synim të eliminojë pasiguritë juridike rreth pagës minimale në nivel kombëtar.
“Projektligji në fjalë ka për qëllim të plotësojë dhe ndryshojë ligjet të cilat edhe ndërlidhin shumën e benificioneve apo kompenzimeve me pagën minimale si dhe të ndryshojë shkallët tatimore në të ardhurat personale dhe të ndryshojë procedurën pra të vendosjes së pagës minimale. Paga minimale është instrument i tregut të punës edhe duhet t’i shërbejë vetëm këtij funksioni. Me miratimin e këtij projektligji paga minimale do të shërbejë vetëm për rritjen e pagës së punëtorëve me pagë të ulët deri në një nivel adekuat si shumë minimale e shpërblimit që një punëdhënësi i kërkohet të paguajë një punëtor për orë pune. Prandaj përmes këtij ligji synohet që të eliminohen mëdyshjet apo pasiguritë juridike rreth pagës minimale në nivel kombëtar, specifikisht lidhshmërinë e pagës me nivelin e benificioneve sociale”, kishte thënë Murati.
Ai ishte shprehur se ky projektligj do të rregullojë edhe shkallën tatimore të pagës minimale për personat që marrin rreth 250 euro në muaj.
“Më tutje ky projektligj rregullon edhe shkallën tatimore për pagën minimale ashtu siç edhe e kemi premtuar dhe që e kemi në programin qeverisës ku tatimi në të ardhurat personale vjetore deri në 3 mijë euro apo rreth 250 euro në muaj do të jenë 0 % apo nuk do të tatimohen. Së fundmi ky projektligj rregullon edhe mënyrën dhe procedurën nga ana e ministrit atëherë kur partnerët socialë pra nuk kanë mundur të arrijnë marrëveshje me njëri tjetrin në Këshillin Social siç e kemi rastin aktual”, kishte deklaruar Murati.
(Kosova Sot Online)
