Vulin e akuzon Perëndimin se po e kërcënon Serbinë me bomba

  • A.P /
  • 22 May 2022 - 12:51
Vulin e akuzon Perëndimin se po e kërcënon Serbinë me bomba

Ministri i Punëve të Brendshme i Serbisë, Aleksandar Vulin e ka akuzuar Perëndimin se qëndron prapa kërcënimeve me bomba që u bënë ditëve të fundit në Beograd

“Kjo është një formë e luftës psikologjike, terrorizmit modern, është e frikshme. Është e pamundur të ndalen këto raportime dhe na takon ne të rrisim parandalimin”, tha Vulin për TV Prva.

Ai tha se “në emaile thuhej se bombat ishin vendosur për shkak se Serbia nuk i ka vendosur sanksione Rusisë”.

“Por nëse vendosim sanksione ndaj Rusisë, a mendoni se kërcënimet nuk do të vinin nga pala tjetër? Në vendet e mëdha, Rusia, Amerika … ka një epidemi të raporteve të tilla. Është thjesht diçka me të cilën duhet të jetoni”, tha Vulin.

Ministri serb që njihet si një nga faktorët më anti-Perëndim dhe më pro-rus në Serbi, iu kundërpërgjigj kërkesave nga SHBA-ja e BE-ja që Serbia të largohet nga Rusia. Më së fundmi, këtë kërkesë e pati edhe ambasadori i SHBA-së në Beograd, Christopher Hill.

“Rusia nuk na ka bombarduar asnjëherë, nuk na ka kërkuar ta njohim Kosovën… Ju duhet të kujdeseni për interesat tuaja. E di, përfaqësuesit e fuqive të mëdha do të thonë ‘mos shikoni të kaluarën’”, tha Vulin.

Më tej, ai nuk e harroi zakonin për ta dëshmuar servilizmin e tij të vazhdueshëm ndaj presidentit serb, Aleksandar Vuçiq.

“Vuçiq ishte i qartë, ai tha se ne do të kujdesemi për veten, imazhin tonë, të kaluarën tonë, të ardhmen tonë. Nuk mund të harrojmë se Rusia pengoi rezolutën britanike të vitit 2015 në Kombet e Bashkuara, se serbët janë një popull gjenocidal. Askush tjetër nuk do ta kishte atë guxim dhe durim”, tha Vulin.

Në fund, ai përsëriti qëndrimin e tij të ngurtë kundër vendosjes së sanksioneve kundër Rusisë.

“A do të ndryshonte vendosja e sanksioneve kundër Rusisë ndonjë gjë në ekonominë e Rusisë? Nuk do të ndryshonte. Pse ka kaq shumë këmbëngulje për të? Pse, pra, nuk thuhet: ‘Ju, serbët, nuk mund të zgjidhni miqtë tuaj, ne do të zgjedhim tanët”, tha ai.

(Kosova Sot Online)