Komunikata e presidencës për takimin me Abazoviq: Bashkëpunimi rajonal në kuadër të Procesit të Berlinit

Presidenca e Kosovës ka lëshuar një njoftim për takimin e Osmanit me kryeministrin e Malit të Zi, Dritan Abazoviq, ku ka treguar detaje rreth takimit. Në komunikatë thuhet se presidentja e Kosovës ka thënë që Procesi i Berlinit është e vetmja rrugë drejt bashkëpunimit rajonal, duke hedhur poshtë mundësinë për bashkim në iniciativën e Ballkanit të Hapur.

Kjo është komunikata e plotë:

Presidentja Osmani takoi kryeministrin e Malit të Zi, z. Dritan Abazoviq

Në margjina të Samitit të Demokracisë së Evropës Juglindore, i cili po mbahet në Mal të Zi, Presidentja e Republikës së Kosovës, Vjosa Osmani ka takuar kryeministrin e Malit të Zi, Dritan Abazoviq.

Në këtë takim, Presidentja Osmani dhe kryeministri Abazoviq kanë diskutuar për raportet bilaterale në mes të dy shteteve dhe mundësitë për avancimin e mëtutjeshëm të tyre.

Presidentja Osmani ka thënë se Kosova e vlerëson dhe e përkrah bashkëpunimin me Malin e Zi në të gjitha fushat, duke theksuar edhe mundësinë për shkëmbim të përvojave për procesin e integrimit evropian.  Më tej, Presidentja Osmani ka kërkuar përkrahjen e qeverisë së Malit të Zi për anëtarësimin e Kosovës në Këshillin e Evropës në vecanti, si dhe në organizata ndërkombëtare në përgjithësi.

Presidentja Osmani dhe Kryeministri Abazoviq theksuan edhe një herë rëndësinë e bashkëpunimit në mes të vendeve të rajonit e me këtë rast. Presidentja Osmani potencoi rëndësinë e bashkëpunimit të ndërtuar mbi premisat e barabarësisë dhe gjithpërfshirjes, si dhe faktin se Kosova përkrahë vazhdimin e bashkëpunimit në kuadër të procesit të Berlinit. Ndërlidhur me zhvillimet në Evropë si pasojë e luftës në Ukrainë, dy liderët diskutuan edhe për rëndësinë e vazhdueshme të koordinimit të veprimeve me Bashkimin Evropian në raport me agresionin rus në Ukrainë.

(Kosova Sot Online)