Lexoni edhe:
Diskutimi për të drejtat e pakicave bën bashkë Kurtin dhe kryetarët e komunave në Prevallë
Ambasadorja e SHBA-së në Mal të Zi: Mbështesim Ballkanin e Hapur pa fusnota dhe në përputhje me parimet e BE-së
Shtetet e Bashkuara të Amerikës mbështesin Ballkanin e Hapur me kusht që të gjitha vendet e rajonit të përfaqësohen në mënyrë të barabartë dhe se ajo të jetë plotësisht e harmonizuar me parimet e Bashkimit Evropian (BE), tha ambasadorja amerikane në Mali i Zi, Judy Rising Reinke.
Në një intervistë për Zërin e Amerikës, e pyetur nëse mbështetja amerikane për atë iniciativë është e pakushtëzuar apo ka kushte, ajo u përgjigj se ka një grup të thjeshtë kushtesh.
“Dhe kjo është se Ballkani i Hapur duhet të jetë plotësisht dhe njëlloj i hapur për të gjashtë vendet e Ballkanit Perëndimor”, tha Reinke.
“Ekziston një grup i thjeshtë kushtesh, dhe ai është që “Ballkani i Hapur” të jetë plotësisht dhe njëlloj i hapur për të gjashtë vendet e Ballkanit Perëndimor. Pa fusnota, pa kushte të veçanta. Pra, përderisa ajo është e hapur për të gjithë dhe për sa kohë që të gjitha parimet brenda Ballkanit të Hapur janë plotësisht në përputhje me kushtet që do të priste BE në procesin e anëtarësimit. Këto janë kushtet”, deklaroi ajo.
Siç tha ajo, kjo do t’u jepte vendeve të Ballkanit Perëndimor një mundësi për të ndërtuar ekonomitë e tyre, për të punuar në vendosjen e normave dhe parimeve rregullatore për lëvizjen e lirë të njerëzve, mallrave dhe burimeve dhe të jenë më të përgatitura para anëtarësimit në BE.
E pyetur nëse shqetësohet për mbështetjen e Rusisë për Ballkanin e Hapur, Reinke u përgjigj se për të nuk është vendimtare se kush e mbështet, por për çfarë bëhet fjalë.
“Dhe ajo që ne kuptojmë dhe mbështesim është Ballkani i Hapur, i cili është njëlloj i hapur për të gjashtë vendet e Ballkanit dhe plotësisht në përputhje me parimet e BE-së”, tha Reinke.
Ndryshe, Shqipëria, Maqedonia e Veriut dhe Serbia janë pjesë e kësaj iniciative rajonale ndërsa Kosova, Mali i Zi dhe Bosnja-Hercegovina deri më tani kanë refuzuar të jenë pjesë e kësaj nisme.
(Kosova Sot Online)
