Pelegrinët myslimanë dynden në Mekë për haxhin e parë pas pandemisë

  • E.K /
  • 01 July 2022 - 13:49
Pelegrinët myslimanë dynden në Mekë për haxhin e parë pas pandemisë

Mijëra pelegrinë filluan të mbërrijnë në qytetin e shenjtë të Mekës në Arabinë Saudite të premten, në mesin e rreth një milion myslimanëve që pritet të marrin pjesë në sezonin e pelegrinazhit të Haxhit 2022 pas dy vitesh ndërprerje të madhe të shkaktuar nga pandemia COVID-19.

Të mbështjellë me rroba të bardha, me disa që mbanin çadra kundër diellit djegës të shkretëtirës, qindra njerëz kryen ritualin e parë të Haxhit, i cili përfshin ecjen në rreth rrotull Qabes, ndërtesës së shenjtë në qendër të Xhamisë së Madhe të Mekës.

"Lavdëruar qoftë Zoti... Është e pamundur të përshkruash ndjenjat e mia tani," tha Ahmed Sayed Mahmoud, një pelegrin egjiptian. “Të jem në Xhaminë e Madhe dhe në tokën e dy xhamive të shenjta më bën shumë të lumtur”.

Arabia Saudite, shtëpia e vendeve më të shenjta të Islamit në Mekë dhe Medinë, lejoi kthimin e udhëtarëve të huaj këtë vit për të kryer Haxhin. Vetëm disa mijëra qytetarë dhe banorë sauditë morën pjesë në pelegrinazhin vjetor në dy vitet e fundit pasi COVID-19 bëri kërdinë në të gjithë ekonominë globale dhe kufizoi udhëtimet.

Megjithatë, autoritetet kanë thënë se vetëm një milion njerëz mund t'i bashkohen sezonit 2022, më pak se gjysma e niveleve para pandemisë, dhe qasja është e kufizuar për pelegrinët e moshës 18 deri në 65 vjeç, të cilët janë vaksinuar plotësisht ose imunizuar kundër virusit dhe nuk vuajnë nga sëmundje kronike..

Oficerët e sigurisë u përzien me pelegrinët brenda xhamisë. Një rrjet kamerash vëzhgimi mbikqyrën rrethinat e tij dhe pikat e kontrollit kontrollonin hyrjen në qytet për të ndihmuar në sigurimin e një Haxhi pa incidente.

Gjatë viteve, mbretëria ka shpenzuar miliarda dollarë për të bërë më të sigurt një nga tubimet më të mëdha fetare në botë.

Në vitin 2019, vitin e fundit para se të godiste pandemia, rreth 2.6 milionë njerëz e kryen haxhin, ndërsa rreth 19 milionë morën pjesë në Umre, një formë tjetër pelegrinazhi në Mekë, i cili - ndryshe nga haxhi - mund të kryhet në çdo kohë të vit.

Një plan i reformës ekonomike i Princit të Kurorës Mohammed bin Salman synon të rrisë kapacitetin e Umres dhe Haxhit në 30 milionë haxhinj në vit dhe të gjenerojë 50 miliardë rialë (13.32 miliardë dollarë) të ardhura deri në vitin 2030.

(Kosova Sot Online)