Lexoni edhe:
Rritet numri i rasteve me Covid-19 në Kosovë, dyfish më shumë sesa dje
Erdoganit s’i këndohet e mira në sondazhe, ky grup votuesish pritet t’ia lëkundin karrigen
Në zgjedhjet e ardhshme në Turqi do të jenë gjashtë milionë votues të cilët do t’i drejtohen kutive të votimit për herë të parë. Këta 6 milionë do të vendosin nëse do t’ia zgjasin pushtetin Recep Tayip Erdoganit apo nëse do të zgjedhin diçka të cilën s’e kanë njohur kurrë- Turqinë pa Erdoganin, shkruan Reuters.
Më pak se 12 muaj larg nga ndoshta zgjedhjet më të mëdha në historinë moderne të Turqisë, një shumicë e madhe e turqve të rinj thonë se duan ndryshim, por mbeten disi skeptikë se opozita mund të përmirësojë siç duhet situatën e punës, shkollat dhe liritë si lirinë e fjalës.
Në rreth 12% të të gjithë votuesve në zgjedhjet presidenciale dhe parlamentare të vendosura për në qershor 2023, rinia do të jetë vendimtare në atë që po formohet si një garë shumë e ngushtë për Erdoganin dhe Partinë e tij në pushtet AK, thonë anketuesit.
Intervistat me turq nga 18-23 vjeç, nga Stambolli metropolitane në Anadollin qendror, tregojnë se drejtësia, emigracioni, punët e bazuara në merita dhe politikat ekonomike transparente janë prioritete.
“Unë nuk jam plotësisht i qetë me vendimin tim, por mendoj se do të zgjedh më të mirën nga më të këqijtë (dhe do të mbështes opozitën),” tha Damla, 19 vjeç, një studente historie në Stamboll, e cila nuk pranoi të jepte një mbiemër.
Trazirat ekonomike dhe rritja e inflacionit i kanë rritur kostot e saj të jetesës edhe pse ajo jeton me familjen dhe nuk del aq shumë me miqtë.
“Ndjehem sikur nuk po jetoj, thjesht po përpiqem të mbijetoj”, tha Damla. “Nëse AK Partia i humb këto zgjedhje, qeveria e re duhet të ndiejë ende presionin e popullit ndaj tyre”, ka shtuar tutje ajo.
Murat Gezici, kreu i firmës së sondazheve Gezici, tha se votuesit e rinj në përgjithësi janë të mërzitur nga qeveria, por nuk janë të lidhur nga një ideologji specifike dhe nuk i besojnë plotësisht opozitës.
Sondazhet e tij tregojnë se votuesit e “gjeneratës Z” të moshës 18-25 vjeç kundërshtojnë ashpër masat e shtypjes ndaj stilit të jetesës, shprehjes së lirë dhe medias. “80% e kësaj gjenerate nuk do të votojnë për AK-në”, tha ai.
Yusuf, 18-vjeçar dhe një tjetër votues për herë të parë, tha se shumica e ekonomive botërore kanë goditur kohë të vështira pas pandemisë së koronavirusit dhe luftës në Ukrainë.
“Unë mendoj se personi që drejton vendin tonë tani është lideri më i mirë dhe më i përshtatshëm…Unë do të votoj për AK Partinë sepse ata bëjnë plane për t’i bërë njerëzit të rehatshëm”, tha ai.
“Ekonomia mund të mos jetë mirë, por ky është rasti në të gjitha vendet.”/
(Kosova Sot Online)
