17 anije presin të nisen, Zelensky shkon në Odesa për të nxjerrë grurin jashtë vendit

Mes bombardimeve dhe luftimeve, presidenti i Ukrainës, Volodymyr Zelensky, sfidoi ushtrinë ruse duke udhëtuar nga Kievi për në Odesa. Këtë vizitë e ndërmori me qëllimin e vetëm për të “dhënë bekimin” e tij për rikthimin e eksporteve. Bashkë me ambasadorët e vendeve të G7-ës, Zelensky inspektoi portin e Odesës në Detin e Zi, nga ku do të nisen disa anije të huaja të mbushura me grurë dhe produkte të tjera. “Është e rëndësishme për ne të mbesim garantor të sigurisë ushqimore globale. Teksa dikush bllokon Detin e Zi dhe merr jetë në vende të tjera, ne mundësojmë që njerëzit të mbijetojnë”, ishte mesazhi i presidentit ukrainas.

Sakaq, Ministria e Infrastrukturës njoftoi se në portin e Odesës gjenden 17 anije të mbushura dhe gati për të eksportuar grurin e Ukrainës. Dërgesat e para pritet që të bëhen gjatë kësaj fundjave, falë marrëveshjeve të arritura me ndërmjetësimin e Turqisë dhe Kombeve të Bashkuara, që do të shërbejnë për garantimin e 3 korridoreve të sigurisë në Detin e Zi./A2CNN

(Kosova Sot Online )