'Perëndimi duhet të zgjohet, Kosova dhe Bosnja janë vijat e ardhshme të fronti'

Ish-ministri i Mbrojtjes në Qeverinë e Britanisë së Madhe, Michael Fallon, përmes një artikulli në gazetën prestigjioze britanike “The Telegraph”, ka komentuar situatën e sigurisë në Ballkan në kontekstin e ndikimit rus.

Fallon në fillim të tekstit të tij ka kujtuar njoftimin ogurzi të një përfaqësuesi të Qeverisë së Serbisë, i cili pati deklaruar se “Serbia duhet të fillojë denazifikimin e Ballkanit”.

Për Fallon, Kosova dhe Bosnja e Hercegovina janë vija e radhës e frontit, pasi që përfaqësojnë demokraci të brishta dhe të dyja vendet janë jashtë NATO-s dhe BE-së.

“Serbia, gjoja ende një kandidate për anëtarësim në BE, po blen aeroplanë dhe tanke ruse, është larg vendosjes së sanksioneve perëndimore ndaj Rusisë dhe presidenti Vuçiç sapo ka nënshkruar një marrëveshje trevjeçare për gazin me Moskën. Kujtojmë se Vuçiq ka qenë ministër i Millosheviç-it për informim”, ka shkruar Fallon.

Ish-ministri i mbrojtjes i Britanisë së Madhe është i mendimit se ngjarjet e fundit në Kosovë, janë produkt i “libri i lojërave të Millosheviç-it”.

“Mosmarrëveshjet kufitare, të nxitura nga ‘operacionet e zeza’, mund të kalojnë lehtësisht në një konflikt më të gjerë,” vuri në dukje ai.

Fallon kujtoi se katër vjet më parë, pasi vizitoi Mariupolin, ai paralajmëroi gjithashtu për cenueshmërinë e Ukrainës lindore dhe beson se Perëndimi bëri shumë pak në këtë drejtim, duke i mohuar Ukrainës statusin e një kandidati për anëtarësim në BE.

“Në Ballkan, ne po bëjmë të njëjtat gabime. Vendeve si Serbia u është dhënë statusi i kanditatit, por pa asnjë perspektivë realiste për t’u anëtarësuar në BE së shpejti. Sondazhet në Beograd tani tregojnë se opinioni publik është kundër tij. BE-ja nuk bën asgjë për të ndihmuar në ndërtimin e institucioneve më të forta qytetare ose për të sinjalizuar një largim nga normat demokratike”, paralajmëron Fallon.

“Demokracitë e reja kanë nevojë për më shumë se sa një dhomë pritjeje. BE-ja duhet të ofrojë qasje të menjëhershme të përkohshme në tregjet e saj dhe fondet e saj strukturore. Duhet të forcohen sistemet e dobëta gjyqësore dhe ligjore. Ne duhet të rrisim praninë e NATO-s atje dhe ta bëjmë të qartë se integriteti kushtetues dhe territorial i këtyre vendeve është i rëndësishëm për të gjithë ne” sugjeroi Fallon.

Fallon beson se vendi i tij ka një rol të madh në këtë dhe se duhet të rrisë praninë e tij diplomatike dhe ushtarake në Kosovë dhe Bosnjë e Hercegovinë.

“Libri i luftërave ballkanike përfundoi shekullin e 20-të. Putini dhe Rusia nuk kanë harruar se si u poshtëruan nga konflikti në aeroportin e Prishtinës gjatë atij të fundit. Nëse Serbia zgjedh përshkallëzimin e mëtejshëm, sigurisht që do të ketë mbështetjen ruse. Putin tashmë u përpoq për të destabilizuar rajonin gjashtë vjet më parë me një grusht shteti të mbështetur nga Rusia, me të cilin ai u përpoq të pengonte Malin e Zi të anëtarësohej në NATO. U pengua, por Rusia nuk e ka humbur interesin”, kujtoi ai.

(Kosova Sot Online)