Detaje nga Brukseli: Targat gati punë e kryer, bllokadë për 'letrat e bardha'

  • A.P /
  • 18 August 2022 - 18:32
Detaje nga Brukseli: Targat gati punë e kryer, bllokadë për 'letrat e bardha'

Disa javë përgatitje, paratakimet në NATO, angazhimi i SHBA-së dhe pesë orë bisedime nuk qenë mjaftueshëm të frytshme sa për t’u arritur ndonjë marrëveshje mes Kryeministrit Albin Kurti dhe Presidentit serb, Aleksandër Vuciq. Ku kanë ngecur palët? Çka konsiderohet punë e kryer deri tash mes Kosovës dhe Serbisë? Pse është i pakënaqur emisari amerikan?.

Ndonëse pritjet ishin për ndonjë marrëveshje, kur Përfaqësuesi i Lartë i BE-së, Josep Borrell u lajmërua tek pasdite, tha se takimi i sotëm ishte “jonormal” dhe ishte thirrur “për menaxhim krizash”.

Gazeta Express ka marrë vesh që sot aty është diskutuar për çështje të hapura, për të cilat palët s’janë pajtuar me njëra-tjetrën. Shpresat e ndërmjetësuesve të Bashkimit Evropian janë që të mbahet një takim tjetër, para 1 shtatorit, kur Qeveria e Kosovës është zotuar se do të fusë në fuqi vendimin për reciprocitet me targa dhe dokumentet e lëshuara nga Serbia.

Siç mëson Gazeta Express, “eliminimi i letrave të bardha”, pra ato që jepen në Serbi kur një shtetas kosovar hyn në territorin e saj, janë pengesa që s’po tejkalohet në këto bisedime.

Me 31 korrik, situata u tensionua pak orë para se të hynte në fuqi vendimi me të cilin Kosova, si Serbia, do t’i pajiste shtetasit serbë me një dokument “hyrje/dalje”. Po ashtu, nuk do të lejoheshin më targat e lëshuara ilegalisht nga Serbia për Kosovë.

Kjo çështje, sipas informacioneve që i ka Express, nuk ka kthim mbrapa. Ndërmjetësuesit përkrahin vendimin e Qeverisë së Kosovës.

“Ndërmjetësit dhe palët konsiderojnë se çështja e targave është e mbyllur, rrjedhimisht serbët duhet t’i marrin targat e Kosovës”, i ka thënë një burim.

Përveç dy përfaqësuesve të Bashkimit Evropian që morën pjesë në takimin e sotëm, në Bruksel, ka shkruar edhe Gabriel Escobar, i angazhuari i SHBA-së për dialogun Kosovë – Serbi.

Express mëson se emisari amerikan është i pakënaqur me Kurtin, pasi që, sipas një burimi, në takim me Blinkenin ka shfaqur mospranueshmëri me dokumentin e Marrëveshjes për të Zhdukurit. Marrëveshja për të zhdukurit, e negociuar nga Skender Hyseni, ishte konsideruar si “marrëveshje e përfunduar”.

Borrell tha sot pas takimit 5-orësh, se nuk ka marrëveshje, por shpresat e tij janë që të ketë takime të tjera, para 1 shtatorit.

“Nuk kemi një marrëveshje sot, por ky nuk është fundi. Të dy liderët janë pajtuar që procesi ka nevojë që të vazhdojë dhe se diskutimet do të rinisin në ditët në vijim. Ka ende kohë deri në shtator. Unë nuk heq dorë”, tha Borrell.

Përfaqësuesi i Lartë i BE-së tha se Kurti dhe Vuciq kanë pasur mundësinë që të shpalosin pikëpamjet lidhur me marrëveshjen gjithëpërfshirëse.

(Kosova Sot Online)