“Do përfundoni poshtë rrotave të makinave” pezullohet policja “ekstravagante” e Elbasanit që kërcënoi gazetarët

  • E.K /
  • 19 August 2022 - 12:46
“Do përfundoni poshtë rrotave të makinave” pezullohet policja “ekstravagante” e Elbasanit që kërcënoi gazetarët

Gjuha e shfrenuar në rrjete sociale kundrejt gazetarëve që kishin raportuar për vrasjen e 33-vjeçarit Madrit Ulqinaku në Elbasan 3 ditë më parë dhe arratisjen e autorit të dyshuar, ka çuar në pezullimin e polices “ekstravagante” të Elbasanit Anisa Kostani.

Policja akuzonte gazetarët për shtrembërim të së vërtetës, madje në postimin e saj përdorte edhe fjalën të degjeneruar. Agjencia e Mbikëqyrjes Policore konfirmoi se ka filluar procedurën e hetimit të thelluar administrativ për këtë specialiste të Drejtorisë Vendore të Policisë së Elbasanit.

Ndaj polices ka nisur hetim për shkelje etike. Kujtojmë se punonjësja e policisë Anisa Kostani u bë e njohur në rrjetet sociale pasi mbante në shtëpinë e saj si kafshë shtëpiake një gjarpër.

Shpërthimi i saj në rrjete sociale me gjuhë rruge kundrejt gazetarëve erdhi sipas saj si përgjigje për ata punonjës të medias që i prishin imazhin qytetit me “të pavërteta”.

NJOFTIMI
Me keqardhje ndoqëm reagimin aspak etik dhe profesional të një oficereje të Policisë së Drejtorisë Vendore të Policisë Elbasan, e cila nëpërmjet një postimi në rrjetet sociale ka fyer gazetarët, me pretendimin se gazetarët po përbaltin punën e Drejtorisë Vendore të Policisë Elbasan.

Përsa më sipër, Drejtori i Përgjithshëm i Policisë së Shtetit Gledis Nano ka pezulluar menjëherë nga detyra oficeren e Policisë, Nënkomisare Anisa Kostani dhe ka urdhëruar Drejtorinë e Standardeve Profesionale në Drejtorinë e Përgjithshme të Policisë së Shtetit për të nisur hetimin disiplinor ndaj kësaj oficereje, për shkelje të rëndë të Rregullores së Policisë së Shtetit, miratuar me VKM nr. 750 datë 16.09.2015, konkretisht të nenit 209, pika 1 “Shkelja e rëndë e atributeve/kompetencave të policisë pa ndonjë arsye bindëse, nuk i përmbush apo dështon në përmbushjen e detyrave dhe përgjegjësive të caktuara, të cilat kanë shkaktuar pasoja të rënda në kryerjen e detyrave”.

Sqarojmë opinionin publik se mendimet dhe opinionet personale të punonjësve të Policisë nuk përfaqësojnë në asnjë rrethanë, mendimet dhe opinionet e organizatës së Policisë së Shtetit, e cila ka një sektor të posaçëm, përmes të cilit komunikon zyrtarisht me median dhe publikun.

Policia e Shtetit është e bindur dhe e vendosur për të krijuar një marrëdhënie partneriteti dhe oponence me median, bazuar në respektin reciprok dhe në të vërtetën.

Policia e Shtetit falënderon gazetarët për punën e tyre në drejtim të informimit të publikut në lidhje me veprimtarinë e organizatës së Policisë së Shtetit dhe kërkon mirëkuptimin e tyre që raste sporadike të mos cënojnë marrëdhëniet korrekte mes gazetarëve dhe Policisë së Shtetit.

(Kosova Sot Online)