Neni që saktëson se cilat mund të jenë arsyet e mbajtjes së një greve

Sipas Ligjit për Greva, njëra ndër arsyet për ngritjen e të punësuarve në greva, mund të jetë mos pagesa e pagave, gjë që së fundi nuk e ka bërë Qeveria e Kosovës. Pra Qeveria Kurti nuk ka ekzekutuar pagesat për mësuesit, stafin shëndetësor.

Në Ligjin Nr. 03/L-200, për greva, Neni 7 saktëson se cilat janë arsyet e mbajtjes së grevës. Pika 1.3 e këtij neni saktëson: për shkak të mos pagesave të pagave. Përveç kësaj pike, janë edhe 5 pika të tjera që tregojnë se cilat janë arsyet për ngritjen e të punësuarve në greva.

Në grevë nga 25 gushti janë mësimdhënësit, edukatorët në kopshte publike, punëtorë të administratës publike, shërbyesit civilë në institucionet lokale dhe qendrore të Kosovës.

Ndërkohë, autoritetet kompetente në Kosovë kanë bërë ekzekutim të pjesshëm të pagave për muajin gusht, për shkak se nuk është përditësuar me kohë lista e personelit që ka punuar deri në fund të muajit. Përditësimi i listës së pagave është i nevojshëm për autoritetet pas grevës të nisur.

Ministri i Financave, Punës dhe Transfereve, Hekuran Murati më 29 gusht në një konferencë për media i paralajmëroi grevistët se nuk do ta marrin pagën e plotë derisa janë në grevë.

“Për 5 ditë pune i bie rreth 90 euro minus këtë muaj [në pagë]”, tha Murati.

Edhe kryeministri i Kosovës, Albin Kurti, tha më 1 shtator se sindikalistët që janë në grevë, nuk mund të paguhen “për punën që nuk e bëjnë”.

(Kosova Sot Online)