Vuk Drashkoviç boton një ditar me bisedat që kishte me Millosheviqin për Kosovën

E.K /
20 September 2022 - 08:52

Ish-politikani famëkeq serb, Vuk Drashkoviç, ka botuar një ditar ku shkruan për bisedat e tij me Sllobodan Millosheviçin, ku pohon që ky i fundit të ketë propozuar që “Kosovën t’ua bëjë koncesion amerikanëve për 50 vite” si dhe që “dëshironte që Kosova të jetë si Hong Kongu”, raportoi mediumi serb “Kurir”.

Drashkoviç shkruan se në vitin 1999, Millosheviç e kishte thirrur atë i bindur se përmes kontakteve të tij do të mund t’i parandalonte bombardimet e NATO-s.

Lexoni edhe:

Gjykata me super ekspertizë financiare për të konstatuar abuzimet me fondin 3% nga Bujar Bukoshi me bashkëpunëtor

Në bisedimet për të hyrë në qeverinë e Millosheviçit, Drashkoviç thotë se këtij të fundit i ka thënë se “besoj se duhet të ulemi me Ibrahim Rugovën, pa kushte dhe kudo”, teksa thotë se Millosheviç i ishte përgjigjur se “pranoj çfarëdo bisede, edhe në Mars, por Kosovë nuk ua japim”.

Në këtë bisedë, Drashkoviç pohon t’i ketë thënë Millosheviçit se “jam në favor që Kosova të merr nivelin më të lartë të autonomisë”.

Në bisedë e sipër, Drashkoviç thotë se përgjigja e Millosheviçit ka thënë se “do ta nënshkruaj…Mes nesh, mbase duhet t’i japim amerikanëve koncesion mbi Kosovën për 50 vite. Që Kosova të jetë siç ka qenë Hong Kongu”.

Përveç kësaj, ish zv/kryeministri i qeverisë së Millosheviçit, Vuk Drashkoviç thotë se në atë takim i ka thënë atij se për të ndaluar bombardimet, “duhet të mos dërgojmë banditë në Kosovë, të respektojmë marrëveshjen me Riçard Hollbrukun, të mos e kërcënojmë Uilliam Uokerin dhe OSBE-në, si dhe t’ia mbyllim gojën Sheshelit”.

Më tej Drashkoviç shkruan edhe për takimin e tij në vitin 2004 me Sekretarin ameirkan të Shtetit, Collin Powell.

Aty Powell ia pren shkurt teksa ai flet për Kosovën. “Zoti Drashkoviç, Kosova ka shkuar”, i thotë Powell derisa Drashkoviç flet për “më shumë se autonomi e më pak se pavarësi”.

“Ai buzqeshi. Dhe tha se me Rezolutën 12/44 në Këshillin e Sigurimit, shteti i Serbisë ‘e humbi Kosovën përjetësisht’”, ka shkruar Drashkovç.