Rreth situatës së sigurisë/Mehaj diskuton me këshillues të NATO-s

  • A.P /
  • 09 November 2022 - 19:04
Rreth situatës së sigurisë/Mehaj diskuton me këshillues të NATO-s

Ekipin Këshillues dhe Ndërlidhës të NATO-s të prirë nga Gjeneral Hoope, këshilltarët bilateralë ushtarakë, si dhe atashetë e mbrojtjes rezidentë në vendin tonë, I priti në takim sot Ministri i Mbrojtjes, Armend Mehaj, transmeton gazeta "Kosova Sot Online".

Mehaj me autoritetet përkatëse diskutoi mbi situatën aktuale politike dhe të sigurisë në vend, rajon dhe më gjerë.

Derisa nga diskutimet e përgjithshme, theks të veçantë kishte çështja e sigurisë pas zhvillimeve të fundit në veri të vendit, të cilat vijnë si rezultat i dezinformatave të vazhdueshme të Beogradit zyrtar, luftës hibride me qëllim destabilizimin e vendit, si dhe përdorimit të metodave të ndryshme të kërcënimit të pjesëtarëve të komunitetit serb për largim nga institucionet e Republikës së Kosovës.


Gjithashtu u theksua se ngritja e kapaciteteve ushtarake të Serbisë përgjatë kufirit me Republikën e Kosovës shpërfaq tendencat e një shteti armiqësor, që përveçse nuk dënon, përkrah e përdor metodat e agresorit rus, gjë që bie ndesh me normat dhe vlerat demokratike të cilat Republika e Kosovës si shtet evropian përqafon dhe mbron. Veprimet e shtetit serb duhet dënuar nga çdo shtet evropian dhe më gjerë.

Ministri Mehaj theksoi se Republika e Kosovës është jashtëzakonisht mirënjohëse për kontributin e shteteve aleate dhe misionin e KFOR-it, që si gjithnjë edhe në situatën aktuale janë duke treguar gatishmëri të jashtëzakonshme për të bashkëpunuar me Policinë e Republikës së Kosovës në ruajtjen e qetësisë, sigurisë dhe stabilitetit në veri të vendit.

“Qeveria e Republikës së Kosovës do të vazhdoj të garantoj integritetin territorial, mbrojtjen e jetës së qytetarëve, dhe ofrimin e shërbimeve të institucioneve për të gjithë qytetarët pa dallim etnie”, tha Mehaj.

(Kosova Sot Online)