Presidentja Osmani tregon çfarë diskutuan me presidentin Macron

  • A.P /
  • 10 November 2022 - 18:38
Presidentja Osmani tregon çfarë diskutuan me presidentin Macron

Përmes një shkrimi, Presidentja e Kosovës, Vjosa Osmani ka njoftuar se sot bashkë me kryeministrin Albin Kurti, e kanë takuar presidentin francez, Emmanuel Macron në Pallatin Elysee në Paris, transmeton gazeta “Kosova Sot Online”


Osmani ka theksuar se Marconin kanë diskutuar për dinamizimin e dialogut me Serbinë dhe zhvillimet e fundit.

Postimi i plotë:

Në Pallatin Élysée, bashkë me Kryeministrin Kurti, u pritëm nga Presidenti i Francës, Emmanuel Macron për të diskutuar partneritetin në mes të dy shteteve tona, dinamizimin e dialogut me Serbinë, si dhe zhvillimet e fundit në vendin tonë. 
Shprehëm përkushtimin e plotë të institucioneve të Kosovës për procesin e dialogut, të bazuar në ruajtjen e sovranitetit, rendit kushtetues, integritetit territorial dhe funksionalitetit të Kosovës, të cilat janë të paprekshme.

Diskutuam edhe veprimet destabilizuese të Serbisë, përmes fuqizimit të strukturave ilegale të saj në Kosovë, frikësimit të qytetarëve serbë dhe nxitjes së grupeve kriminale për ta cenuar rendin dhe ligjin në veri. Kosova mbetet e angazhuar, në koordinim me partnerët ndërkombëtar, për paqe, stabilitet dhe për të garantuar një mjedis të sigurt për të gjithë qytetarët e vendit. Ndërkaq, Presidenti Macron potencoi përkrahjen e tij për paqe, siguri dhe stabilitet në Kosovë dhe rajon.

Në takim, ritheksuam rëndësinë e përfundimit të procesit të liberalizimit të vizave përgjatë presidencës çeke të Këshillit të BE-së, si dhe kërkuam vazhdimin e mbështetjes së Francës për integrimin euroatlantik të Kosovës dhe anëtarësimin në organizata tjera ndërkombëtare

Image

(Kosova Sot Online)