Erdogan: Marrëveshja e drithit me Ukrainën e ndërmjetësuar nga Turqia zgjatet me katër muaj

Presidenti turk Rexhep Tajip Erdogan ka thënë se është arritur një marrëveshje për të zgjatur iniciativën për drithërat e Detit të Zi me 120 ditë, transmeton gazeta “Kosova Sot Online”.

Erdogan tha të enjten se është e qartë se sa e rëndësishme është marrëveshja për furnizimin dhe sigurinë globale të ushqimit.

Ai falënderoi Sekretarin e Përgjithshëm të OKB-së Antonio Guterres, liderët rusë dhe ukrainas për gatishmërinë e tyre për të zgjatur marrëveshjen dhe përgëzoi të përfshirët.

Më herët, presidenti ukrainas Volodymyr Zelenskyy njoftoi zgjatjen, duke shtuar se Guterres dhe Erdogan "morën vendimin kyç në luftën globale kundër krizës ushqimore".

Ministria e infrastrukturës e Ukrainës tha në një deklaratë se "vendimi sapo u mor në Stamboll" dhe se "Kombet e Bashkuara dhe Turqia mbeten garantues të Iniciativës".

Marrëveshja fillestare e arritur në korrik ka ndihmuar në shmangien e një krize globale ushqimore duke lejuar eksportin e ushqimit dhe plehrave nga disa nga portet e Detit të Zi të Ukrainës që ishin bllokuar nga Rusia.

Turqia, OKB, Rusia dhe Ukraina nënshkruan një marrëveshje më 22 korrik në Stamboll për të rifilluar eksportet e grurit nga tre porte ukrainase të Detit të Zi, transmeton gazeta “Kosova Sot Online”, të cilat u ndaluan pas fillimit të luftës Rusi-Ukrainë në shkurt.

Palët po negocionin një zgjatje dhe zgjerim të mundshëm përtej skadimit të planifikuar të shtunën, më 19 nëntor, me Erdogan duke thënë se Ankaraja është e vendosur të dërgojë grurë dhe plehra ruse në vendet më pak të zhvilluara.

(Kosova Sot Online)