Kusari: Ja pse Borrell ka dalë tërësisht në anën e Serbisë

Joseph Borrell ka dalë tërësisht në anën e Serbisë, duke përdorur gjuhë denigruese ndaj Kosovës, ka deklaruar Shefja e Grupit Parlamentar të Lëvizjes Vetëvendosje, Mimoza Kusari Lila, transmeton gazeta "Kosova Sot Online".

“Borrell në mënyrën se si është prezantuar ka dalë tërësisht në anën e Serbisë, duke e lënën Kosovë, apo duke e përdorur një gjuhë, që është e para denigruese dhe e dyta tepër shumë patronizuese, edhe pse e di që dikush mund të thotë kush është Kosova, Kosova ka nevojë për Bashkimin Evropian. Po, është e vërtetë, Kosova ka nevojë për procesin e integrimit, ka nevojë për ndihmë, por Kosova nuk ka nevojë për mënyrën dhe trajtimin nënçmues dhe përçmues të përfaqësuesit të lartë të BE-së me politikën që e përfaqëson”, ka thënë Kusari.

Sipas saj, para se të ndodhte takimi, Borrelli ka ndarë me palët një deklaratë, në të cilën kishte një afat për marrëveshjen finale, por, siç tha ajo me kërkesë të Vuçiqit ai e ka tërhequr atë deklaratë.

“Borrelli, para se të ndodhte takimi, e ka ndarë me palët një deklaratë, në të cilën ka një afat për marrëveshjen finale. Fakt është që zotëri Borrell gjatë takimit me kërkesë të Vuçiqit e tërhequr atë deklaratë. E ka tërhequr atë deklaratë për të cilën palët do të duhej të dakordoheshin”, ka shtuar ajo.

(Kosova Sot Online)