Putin i thotë Scholz-it se sulmet në infrastrukturë në Ukrainë janë 'të pashmangshme'
Presidenti rus Vladimir Putin i tha homologut gjerman Olaf Scholz të premten se sulmet e Moskës në infrastrukturën e Ukrainës ishin "të pashmangshme" dhe akuzoi Perëndimin për ndjekjen e politikave "shkatërruese", tha Kremlini, transmeton gazeta “Kosova Sot Online”.
“U vu re se Forcat e Armatosura Ruse ishin përmbajtur prej kohësh nga sulmet me raketa precize kundër caqeve të caktuara në territorin e Ukrainës”, tha Kremlini në një deklaratë pas bisedimeve telefonike, të parat midis Putinit dhe Scholz që nga mesi i shtatorit.
“Por tani masa të tilla janë bërë një përgjigje e detyruar dhe e pashmangshme ndaj sulmeve provokuese të Kievit ndaj infrastrukturës civile të Rusisë”, shtoi Kremlini.
Moska në javët e fundit ka goditur rrjetet energjetike të Ukrainës, duke lënë miliona në të ftohtë dhe në errësirë me afrimin e dimrit.
“Vëmendja u tërhoq nga linja shkatërruese e shteteve perëndimore, përfshirë Gjermaninë, që po pompojnë me armë regjimin e Kievit dhe po trajnojnë ushtrinë ukrainase”, thuhet në deklaratën e Kremlinit.
Putin tha se "mbështetja politike dhe financiare" nga aleatët perëndimorë të Ukrainës "çon në faktin se Kievi e refuzon plotësisht idenë e çdo negociate".
(Kosova Sot Online)
