Inflacioni turk bie për herë të parë pas një viti

Inflacioni vjetor në Turqi u lehtësua paksa në nëntor për herë të parë në më shumë se një vit, sipas shifrave zyrtare të publikuara të hënën, megjithëse ai mbetet pranë niveleve më të larta të 24 viteve, transmeton gazeta "Kosova Sot Online". 

Çmimet e konsumit për vitin u rritën me 84.39% në nëntor, nga 85.51% e regjistruar në tetor, njoftoi Instituti i Statistikave Turke. Norma mujore e inflacionit ishte 2.88% në muajin nëntor, krahasuar me 3.51% një muaj më parë.

Është hera e parë që inflacioni vjetor është ulur që nga maji 2021.

Ndërsa pandemia dhe pushtimi rus i Ukrainës kanë nxitur inflacionin në mbarë botën, ekonomistët besojnë se inflacioni në Turqi u ushqye nga besimi i Presidentit Recep Tayyip Erdogan se kostot e larta të huamarrjes çojnë në çmime më të larta. Mendimi tradicional ekonomik thotë se rritja e normave ndihmon në frenimin e inflacionit.

Banka qendrore e Turqisë ka ulur normat e interesit me 5 pikë përqindjeje që nga gushti, në 9% pavarësisht inflacionit të lartë që ka thelluar një krizë të kostos së jetesës në vend. Në të kundërt, bankat qendrore në mbarë botën kanë rritur normat për të luftuar inflacionin në rritje.

Erdogan ka thënë se modeli i tij – i cili ka prioritet rritjen, investimet, punësimin dhe eksportet – pritet të japë rezultate në vitin e ri.

(Kosova Sot Online)