Ish policit të Kosovës Dejan Pantiq i caktohet masa e paraburgimit
Kërkesën e Prokurorisë Themelore për caktimin e masës së paraburgimit ndaj ish policit të Policisë së Kosovës, Dejan Pantiq, e ka aprovuar Gjykata Themelore në Prishtinë, transmeton gazeta “Kosova Sot Online”.
Lajmin e ka konfirmuar zëdhënësja e Gjykatës Themelore, Mirlinda Gashi.
Ajo tha se ndaj Pantiqit është caktuar masa e paraburgimit prej 30 ditësh pasi ddyshohet për “kryerjen e veprës penale terroriste”.
Pantiq u arrestua nga Policia e Kosovës të shtunën nën dyshimin se ka organizuar sulmet në zyrat e KKZ-së dhe ndaj personave zyrtarë të KQZ-së dhe Policisë së Kosovës.
Për këtë, serbët lokalë vendosën barrikada në rrugët që çojnë në Jarinjë dhe Bërnjak.
Për arrestimin e Pantiq kishte njoftuar edhe ministri i Brendshëm, Xhelal Sveçla.
“Policia e Kosovës sot ka ndaluar në Pikën Kufitare në Jarinje ish-zyrtarin policor, ish-pjesëtarin e MUP-it, i cili ishte integruar më parë në Policinë e Kosovës, Dejan Pantiq. I ndaluari sipas dëshmive të Policisë së Kosovës ka organizuar sulmin terrorist në zyrat e KKZ-së në veri të vendit me ç’rast ishin sulmuar zyrtarët e KQZ-së dhe zyrtarët policorë. Pantiqi akuzohet për kryerjen e veprave terroriste dhe sulm kundër rendit kushtetues”, ka shkruar Sveçla në Facebook.
(Kosova Sot Online)
