Latifi: Vuçiqi ka nxitur rebelimin e serbëve në veri, ka nisur propagandën për rikthimin e ushtrisë serbe në Kosovë

Profesori universitar i filozofisë, Blerim Latfifi, ka shkruar se  presidenti i Serbisë, Aleksandër Vuçiq, ka nxitur rebelimin e serbëve lokalë për ta krijuar një krizë, në mënyre që t’i shmanget planit franko-gjerman, përcjell "Kosova Sot Online".

Tutje, Latifi ka shkruar se Vuçiqi ka nxitur rebelimin e serbëve në veri dhe se ai ka nisur propagandën për rikthimin e ushtrisë serbe në Kosovë.

Postimi i plotë:

E gjithë kjo dramë e Veriut lidhet me planin franko-gjerman. Dje Borrelli tha se 27 vendet e BE-së janë pajtuar me planin. Kosova ka dhënë shenja të qarta se pajtohet me të. Serbia, ndërkaq, duket se e ka refuzu. Që të shmangë presionin ndërkombëtar për shkak të refuzimit, Vuçiqi ka nxitur rebelimin e serbëve në veri dhe ka nisur propagandën për rikthimin e ushtrisë serbe në Kosovë. Kjo është logjika e horrave në politikë: që të shmangin një problem, e krijojnë një tjetër; për t'i ikur një krize, e shpikin një krizë tjetër.

Në këtë kontekst Kosova thjesht po përpiqet të mbrojë atë që thuhet në ligjin e saj themelor, në Kushtetutën e Republikës.

A ka bërë kryeministri Kurti gabime në këtë drejtim?

Po, disa.Parasegjithash duke i shpërfillur këshillat amerikane, duke besuar se mund t'ia dalë i vetëm në vendosjen e rendit në veri dhe duke këmbëngulur në pikëpamjen e tij të vjetër se shkaku i problemit të veriut gjendet në Prishtinë. Shpresojmë të ketë marrë mësimet e duhura nga këto gabime.

Ky është thelbi i krejt kësaj drame.Të tjerat janë kakofoni e transheve partiake dhe e platformave të mosdurimit personal.

(Kosova Sot Online)