Sveçla: Ka filluar një fushatë dezinformuese e Beogradit
Pasi në mediat serbe po raportohet se kinse Policia e Kosovës ka lista mbi të cilat po arreston ish-policët, ka reaguar ministri i Brendshëm, Xhelal Sveçla, transmeton gazeta “Kosova Sot Online”.
Sveçla ka thënë se e gjithë kjo është një fushatë dezinformuese e Beogradit, për të arsyetuar veprimet kriminale që nuk ka të ndalur.
Ai tha se nuk ka lista të tilla, dhe se në Republikën e Kosovës, prokuroria që ndjek krimin është degë tjetër e pushtetit prej policisë që zbaton ligjin e urdhrat dhe prej Ministrisë së Punëve të Brendshme që është degë e ekzekutivit.
“Fushata dezinformuese se një ish-polic në Mitrovicën e Veriut është arrestuar dhe se janë penguar punonjësit e elektrodistribucionit, vërteton edhe njëherë nevojën që barrikadat duhet të hiqen menjëherë dhe se normaliteti duhet të kthehet sa më parë në këtë zonë”, tha Sveçla.
(Kosova Sot Online)
