KPK: Deklaratat e Kurtit mund ta rrezikojnë jetën e prokurorit
Ndaj deklaratave të kryeministrit të Kosovës, Albin Kurti pas ricaktimit të masës ndaj të dyshuarit për vepra terroriste, Dejan Pantiq, ka reaguar Këshilli Prokurorial i Kosovës, transmeton gazeta “Kosova Sot Online”.
Pas lirimit nga paraburgimit të Pantiqit në arrest shtëpiak, Kurti ka pyetur se si mund të dërgohet në arrest shtëpiak i dyshuari për terrorizëm.
Ndaj kësaj deklarate, KPK është shprehur thellësisht i shqetësuar.
“KPK vlerëson që reagimet e tilla të Kryeministrit Kurti dhe vartësve të tij janë tendencë për ndërhyrje në punët dhe pavarësinë e sistemit prokurorial të Republikës së Kosovës. Po ashtu, KPK shpreh indinjatën e thellë me kërkesën e Kryeministrit Kurti për t’u informuar me emrin e prokurorit i cili ka bërë kërkesë për ndërrimin e masës ndaj të pandehurit Pantiq, nga se kjo përveç që ndikon në punën e pavarur të prokurorit, mund të nxitë edhe reagime që do mund të rrezikojnë jetën e tij”, thuhet në reagim.
(Kosova Sot Online)